پہلگام میں ناقص ڈرینیج نظام سے مقامی باشندے اور ہوٹلیئر پریشان

مشہور سیاحتی مقامی پہلگام کے باشندوں نے پہلگام ڈیولپمنٹ اتھارٹی کے خلاف برہمی کا اظہار کرتے ہوئے کہا کہ ’’ڈرین کی تعمیر پر کروڑوں روپے خرچ کیے جانے کے باوجود بھی ڈرینیج سسٹم ناکارہ ہے۔‘‘

پہلگام ڈیولپمنٹ اتھارٹی کے خلاف احتجاج کرتے ہوئے گنائی محلہ، پہلگام کے باشندوں نے کہا کہ چند برس قبل ہی تعمیر کی گئی ڈرین پوری طرح ناکام ہو چکی ہے۔

لوگوں کے مطابق گنائی محلہ، پہلگام میں چار سال قبل تعمیر کی گئی ڈرین پر کروڑوں روپے خرچ کیے گئے تاہم ان کے مطابق ڈرین تعمیر کیے جانے کے باوجود علاقے کو اس کا کوئی فائدہ حاصل نہیں ہو رہا۔ انہوں نے بتایا کہ ڈرین میں اکثر و بیشتر گندا پانی جمع رہتا ہے جو سڑکوں، لوگوں کے صحنوں اور دریائے لدر میں چلا جاتا ہے۔

مقامی باشندں نے کہا کہ کئی مرتبہ احتجاج کیے جانے کے بعد ایس ڈی ایم پہلگام نے گنائی محلہ کا دورہ کرکے لوگوں کو یقین دلایا تھا کہ ’’ڈرین کی مرمت کی جائے گی لیکن زمینی سطح پر کوئی قدم نہیں اٹھائے جا رہے۔‘‘

مقامی باشندوں کے مطابق پہلگام کے اکثر و بیشتر افراد سیاحت کے شعبے سے ہی وابستہ ہیں، تاہم علاقے میں ناقص ڈرینیج سسٹم ہونے کے سبب سیاح یہاں کے ہوٹلوں میں رہنا پسند نہیں کرتے۔

انہوں نے حیرانگی کا اظہار کرتے ہوئے کہا: ’’کروڑوں روپے خرچ کئے جانے کے باوجود بھی ڈرین جس مقصد کے لئے تعمیر کیا گیا تھا وہ مقصد پورا نہیں ہوا۔‘‘