اننت ناگ میں سی سی ٹی وی نصب کرنے کا حکم

جنوبی کشمیر کے ضلع اننت ناگ میں انتظامیہ نے سرکاری و نجی دفاتر کے ساتھ ساتھ مصروف بازاروں، بس اور سومو اسٹینڈز اور انٹری فیس کلیکشن چیک پوسٹ وغیرہ میں سی سی ٹی وی نصب کیے جانے کے احکام صادر کیے ہیں۔

ضلع انتظامیہ اننت ناگ نے مختلف سرکاری محکموں اور نجی کمپنیوں کے علاوہ شاپنگ مالز اور دیگر کاروباری اداروں بشمول ہوٹلز ریستوران، کلینک، نرسنگ ہومز اور اسپتالوں میں (اندرون اور بیرون) سی سی ٹی وی کیمرے نصب کرنے کا حکم دیا ہے۔

حکم نامہ کے مطابق ’’سماج دشمن عناصر اور ان کی سرگرمیوں پر نظر رکھنے کے لیے مزید نگرانی کے اقدامات کی ضرورت ہے اس لئے مصروف ترین بازاروں اور دفاتر میں سی سی ٹی وی کیمروں کی تنصیب کی ضرورت ہے۔‘‘

حکم نامے میں کہا گیا ہے کہ ’’مصروف عوامی مقامات پر سی سی ٹی وی کی تنصیب مجرمانہ حرکات کو روکنے کا ایک اہم ذریعہ ثابت ہوگا، جو نہ صرف چوری سمیت دوسرے جرائم کو روکنے بلکہ بعض اوقات عوام کی جان و مال کی حفاظت کو ممکن بنانے کا ایک مفید ذریعہ ہے۔‘‘

ڈپٹی کمشنر اننت ناگ نے تمام محکموں اور اداروں کے سربراہان کو حکم دیا ہے کہ وہ کم از کم 15 دن کے ڈیٹا اسٹوریج کی گنجائش کے ساتھ دفاتر میں سی سی ٹی وی کیمروں کی تنصیب کو یقینی بنائیں۔

میونسپل کونسل یا کمیٹیوں سے کہا گیا ہے کہ وہ اپنے دفاتر کے ساتھ ساتھ مصروف بازاروں، بس اور سومو اسٹینڈز اور انٹری فیس کلیکشن چیک پوسٹ وغیرہ میں سی سی ٹی وی کی تنصیب کو یقینی بنائیں۔

یہ بھ پڑھیں:کوکرناگ: پہلی مرتبہ سڑک کے میگڈمائزیشن پر عوام کا اظہار مسرت

’’سرکاری اور نجی شعبے کے بینک انشورنس کمپنیاں اور تمام مرکزی حکومت کے محکمے اپنے دفتر کے احاطے میں اور باہر سی سی ٹی وی کیمروں کی تنصیب کو بھی یقینی بنائیں۔‘‘ ہوٹلز، ریستوران اور کلینک، نرسنگ ہومز اور ہسپتالوں سمیت تمام اداروں کو بھی حکم دیا گیا کہ وہ یہ یقینی بنائیں کہ قانون نافذ کرنے والے اداروں (لاء انفورسمنٹ ایجنسیز) کی نگرانی کے لئے سی سی ٹی وی کی ایچ ڈی ڈی (اسٹوریج ڈیوائس) ہمیشہ دستیاب رکھیں۔