زخمی نابالغ لڑکی زندگی کی جنگ ہار گئی

جنوبی کشمیر کے ضلع اننت ناگ کے بجبہاڑہ علاقے میں حادثہ میں شدید زخمی ہونے والی طالبہ فوت ہو گئی۔

تفصیلات کے مطابق ضلع اننت ناگ کے گنٹالی پورہ بجبہاڑہ علاقہ سے تعلق رکھنے والی سولہ سالہ فضا جان دختر بشیر احمد الاہی چند روز قبل اُس وقت حادثہ کا شکار ہوئی تھی جب وہ اسکول سے اپنے گھر کی جانب لوٹ رہی تھی جس دوران ایک کار نے اسے شدید ٹکر ماری۔

فضا جان کے سر میں گہری چوٹ لگی تھی جس کے بعد انہیں اننت ناگ کے گورنمنٹ میڈیکل کالج میں داخل کیا گیا تاہم نازک حالت کو دیکھتے ہوئے انہیں سرینگر کے صورہ ہسپتال منتقل کیا گیا۔ جہاں وہ تین روز تک موت و حیات کی کشمکش میں مبتلا رہی تاہم پیر کی صبح وہ زندگی کی جنگ ہار گئی۔

فضا کی میت کو جب ان کے آبائی علاقہ واقعہ گنٹالی پورہ پہنچایا گیا تو وہاں صف ماتم بچھ گئی اور انہیں اپنے آبائی قبرستان میں پر نم آنکھوں سے سپرد خاک کر دیا گیا۔

فضا دسویں جماعت کی ایک ہونہار طالبہ تھی وہ بجبہاڑہ کے ایک نجی اسکول میں زیر تعلیم تھی۔