Wrestler Protest پہلوانوں کا احتجاج جنترمنتر سے باہر، پیدل مارچ کے ذریعے حمایت کی اپیل

جنتر منتر پر پہلوانوں کے احتجاج کا آج 24ویں دن ہے۔ پہلوان ونیش پھوگاٹ نے کہا کہ ایسا لگتا ہے کہ وہ صرف جنتر منتر تک محدود ہوکر رہ گئے ہیں۔ اس لیے اب وہ پیدل مارچ کریں گے۔ Wrestler Protest

نئی دہلی: گزشتہ 23 دنوں سے جنتر منتر پر دھرنے پر بیٹھے پہلوانوں نے ریسلنگ فیڈریشن آف انڈیا کے سابق صدر برج بھوشن شرن سنگھ کی گرفتاری کا مطالبہ کرتے ہوئے کہا کہ اب وہ ملک کے باقی حصوں میں احتجاج کریں گے۔ اس دوران ونیش پھوگاٹ نے کہا کہ اب ایسا لگتا ہے کہ ہم صرف جنتر منتر تک محدود ہو گئے ہیں۔ اس لیے اب وہ دیگر مقامات پر بھی احتجاج کریں گے۔ پیر کو اس کا آغاز کناٹ پلیس سے پہلوانوں نے کیا۔

ونیش نے ایک بار پھر دہرایا کہ ہم نے 21 مئی کی آخری تاریخ طے کی ہے۔ اگر اس وقت تک کوئی کارروائی نہ ہوئی تو اس کے بعد بڑا فیصلہ کریں گے۔ انہوں نے کہا کہ کچھ لوگ ان کی شبیہ کو خراب کرنے کی کوشش کر رہے ہیں۔ اب تک ملک بھر سے جس طرح کی حمایت ملی ہے اس کے لیے ہم ان سب کا شکریہ ادا کرتے ہیں۔ ملک بھر کی کسان تنظیموں، خواتین کی تنظیموں، سماجی تنظیموں نے جس طرح انصاف دلانے کے لیے ہمارا ساتھ دیا ہے اس کی ہمیں توقع بھی نہیں تھی۔ لوگوں کی حمایت سے ہمارا جوش بڑھا ہے اور ہم یہ جنگ اپنے لیے نہیں بلکہ آنے والی بیٹیوں کے مستقبل کے لیے لڑ رہے ہیں۔'

وہیں پہلوان ساکشی ملک نے کہا کہ ہم نے بی جے پی کے تمام مرکزی وزراء اور خواتین ممبران پارلیمنٹ کو خط لکھا ہے اور ان سے مطالبہ کیا ہے کہ جس طرح سے سیاسی پارٹیوں کے لیڈر ہماری حمایت کر رہے ہیں، آپ خواتین کے طور پر ہمارا ساتھ دیں۔ ہم نے انہیں ایک خط بھی لکھا ہے اور ہمیں امید ہے کہ وہ ہمارا ساتھ دیں گے۔ جب تک برج بھوشن شرن سنگھ کو گرفتار نہیں کیا جاتا ہمارا احتجاج جاری رہے گا۔ تاہم آج احتجاج کا 24 واں دن ہے۔ بتا دیں کہ اب جنتر منتر سے اٹھنے کے بعد پہلوان دہلی کے مختلف علاقوں میں جا کر پیدل یاترا نکال رہے ہیں اور پیدل مارچ کے ذریعے عوام سے حمایت مانگ رہے ہیں۔