بھارت کے شیو پال سنگھ ٹوکیو اولمپکس کے لیے کوالیفائی کرنے والے دوسرے جیولن تھروئر بن گئے ہیں۔ جنوبی افریقہ میں کھیلے گئے ایتھلیٹکس ٹورنامنٹ میں کوالیفائی کرنے کے ساتھ انہوں نے اولمپک کوٹہ حاصل کیا۔
منگل کے روز جنوبی افریقہ میں کھیلے گئے ایتھلیٹکس ٹورنامنٹ کے دوران انہوں نے اپنی تھرو سے 85.47 میٹر کی دوری حاصل کی جس کی وجہ سے وہ 2020 کے ٹوکیو اولمپکس میں جگہ بنانے میں کامیابی حاصل کرنے میں کامیاب رہے۔
اس کامیابی پر وزیر کھیل کرن رجیجو نے ٹویٹ کیا اور انہیں مبارکباد دی۔ رجیجو نے ٹویٹ کرکے لکھا 'ایک اچھی خبر ہے۔ شیوپال سنگھ نے جنوبی افریقہ میں کھیلے جانے والے ایتھلیٹکس ٹورنامنٹ میں 85.47 میٹر کے فاصلے کے ساتھ ٹوکیو کے لیے کوالیفائی کیا۔ کوالیفیکیشن کا نشان 85 میٹر تھا۔ مبارک ہو شیو پال۔'
واضھ رہے کہ نیرج چوپڑا کے بعد شیو پال سنگھ ٹوکیو اولمپکس میں بھارت کی نمائندگی کرنے والے دوسرے کھلاڑی بن گئے ہیں۔ اس برس انجری سے واپس آنے کے بعد بھارت کے اسٹار جیولن کھلاڑی نیرج چوپڑا نے 87.86 میٹر کے فاصلے کے ساتھ اولمپک کوٹہ حاصل کیا تھا۔
