لاہور: پی سی بی نے 18 ریجنل ٹیموں کی نمائندگی کرنے والے 360 کرکٹرز کو 2023-24 کے سیزن میں ڈومیسٹک کنٹریکٹس دینے کا فیصلہ کیا ہے۔ اس ڈھانچے کو سات کیٹگریز میں تقسیم کیا گیا ہے۔
اے پلس کیٹگری میں 20 کرکٹرز، اے کیٹگری میں 30کرکٹرز، بی کیٹگری میں 30 کرکٹرز، ڈی کیٹگری میں 30 کرکٹرز، ای کیٹگری میں 50 کرکٹرز اور ایف کیٹگری میں 170 کرکٹرز شامل ہیں۔ پاکستان کرکٹ بورڈ ان کھلاڑیوں کے ناموں کا اعلان بعد میں کرے گا۔
یاد رہے کہ 11اگست کو پاکستان کرکٹ بورڈ نے نئے ڈومیسٹک کرکٹ ڈھانچے کا اعلان کیا تھا جس میں آٹھ ڈپارٹمنٹس اور آٹھ ریجنل ٹیموں کو الگ الگ فرسٹ کلاس ٹورنامنٹ میں حصہ لینا ہے اس کا مقصد کھیل کے معیار کو مزید بہتر کرنا ہے تاکہ ڈپارٹمنٹس اور ریجنز یکساں طور پر مقابلے کرتے ہوئے بہترین ٹیلنٹ کو استعمال میں لاسکیں۔
اس ڈومیسٹک ڈھانچے کو تمام ڈپارٹمنٹس اور ریجنز کے نمائندوں کی مشاورت سے پی سی بی کی ٹیکنیکل کمیٹی نے تیار کیا ہے جس کے سربراہ مصباح الحق اور محمد حفیظ رکن ہیں۔
نیا کرکٹ سیزن دس ستمبر کو قائداعظم ٹرافی سے شروع ہوگا جس میں آٹھ ریجنل ٹیمیں حصہ لیں گی جبکہ آٹھ ڈپارٹمنٹس ٹیمیں پندرہ دسمبر سے شروع ہونے والی پریذیڈنٹ ٹرافی میں حصہ لیں گی۔