بھونیشور: اڈیشہ حکومت نے 13 سے 29 جنوری تک بھونیشور اور رورکیلا میں کھیلے جانے والے مردوں کے ہاکی ورلڈ کپ کے لیے چھ ریاستوں کے وزرائے اعلیٰ کو مدعو کیا ہے۔ ریاست کے فوڈ سپلائی اور کنزیومر ویلفیئر کے وزیر آتنو سبیاساچی نائک نے چنئی میں تمل ناڈو کے وزیر اعلی ایم کے اسٹالن اور پڈوچیری کے وزیر اعلیٰ این رنگاسوامی سے پڈوچیری میں ملاقات کی اور ذاتی طور پر وزیر اعلی نوین پٹنائک کی جانب سے ہاکی ورلڈ کپ کے دیدار کے لیے دعوت نامہ دیا۔ Odisha Government Inviting All Chief Ministers For Hockey World Cup 2023
سائنس اور ٹیکنالوجی کے وزیر اشوک چندر پانڈا نے دہلی میں آندھرا پردیش کے وزیر اعلی وائی ایس جگن موہن ریڈی سے ملاقات کی اور ذاتی طور پر پٹنائک کو دعوت نامہ سونپا۔ آندھرا پردیش کے وزیراعلی نے وزیراعلی نوین پٹنائک کے تئیں اپنی ستائش کا اظہار کیا۔ ایس ٹی/ایس سی وزیر جگناتھ سرکا نے رانچی میں جھارکھنڈ کے وزیر اعلیٰ ہیمنت سورین سے ملاقات کی اور انہیں ورلڈ کپ ہاکی میں شرکت کے لیے پٹنائک کا دعوت نامہ سونپا۔
ریاستی وزیر خزانہ نرنجن پجاری نے دہلی میں اتر پردیش کے وزیر اعلی یوگی آدتیہ ناتھ سے ملاقات کی اور ریاست کے اسٹیل اور کانوں کے وزیر پرفل ملک نے پٹنہ میں بہار کے وزیر اعلی نتیش کمار سے ملاقات کی اورانہیں ورلڈ کپ ہاکی کے لیے وزیر اعلی نوین پٹنائک کادعوت نامہ دیا۔