منو بھاکر کو بی بی سی ایمرجنگ پلیئر آف دی ایئر ایوارڈ

ٹوکیو اولمپکس میں بھارت کی ابھرتی ہوئی نوجوان نشانے باز منو بھاکر کو بی بی سی ورچوئل ایوارڈ تقریب میں ایمرجنگ پلیئر آف دی ایئر ایوارڈ سے نوازا گیا ہے۔

ایمرجنگ پلیئر ایوارڈ کا اعلان انگلینڈ کے عظیم کرکٹ کھلاڑی بین اسٹوکس نے کیا۔ یہ ایوارڈ پہلی مرتبہ ایوارڈ تقریب میں شامل کیا گیا ہے۔ منو کو یہ ایوارڈ لیجنڈ انڈین ایتھلیٹ انجو بابی جارج نے دیا۔ یہ ایوارڈ تقریب 8 مارچ کو عالمی یوم خواتین کے موقع پر منعقد کی گئی۔

منو بھاکر کو بی بی سی ایمرجنگ پلیئر آف دی ایئر ایوارڈ

منو نے ورچوئل تقریب کے دوران کہا کہ یہ ایوارڈ میرے لئے بہت معنی رکھتا ہے۔ مجھے لگتا ہے کہ اس کے ذریعے ہی میری محنت کو سراہا گیا ہے۔ لوگوں کو اب اس کے بارے میں پتہ چل گیا ہے۔ لائف ٹائم اچیومنٹ ایوارڈ حاصل کرنے والی انجو بابی جارج سے یہ ایوارڈ حاصل کر کے حقیقت میں ایسا لگ رہا ہے کہ ایک ابھرتے ہوئے کھلاڑی کی حوصلہ افزائی کی جارہی ہے۔

واضح رہے کہ منو بھاکر آئی ایس ایس ایف میں سونے کا تمغہ جیتنے والی کم عمر بھارتی نشانے باز ہیں۔ 19 سالہ بھاکر نے 16 سال کی عمر میں ہی انٹرنیشنل شوٹنگ اسپورٹ فیڈریشن (آئی ایس ایس ایف) ورلڈ کپ 2018 میں دو طلائی تمغے جیتے تھے۔ اس کے بعد انہوں نے یوتھ اولمپک کھیلوں میں ایک سونے کا تمغہ اور اسی سال کامن ویلتھ گیمس میں بھی ایک سونے کا تمغہ جیتا تھا۔

یو این آئی