Indian Women's Football Team اردن، ازبکستان دورے کے لیے بھارتی خواتین فٹ بال ٹیم اسکواڈ کا اعلان

بھارتی خواتین فٹ بال ٹیم کا اردن اور ازبکستان دورے کے لیے 23 رکنی اسکواڈ کا اعلان کر دیا گیا ہے۔ بھارت اردن میں 17 سے 22 مارچ تک میزبان ٹیم سے کھیلے گی۔ Indian Football Team squad for Jordan tour

نئی دہلی: بھارتی خواتین فٹ بال ٹیم کے ہیڈ کوچ تھامس ڈینربی نے جمعرات کو 23 رکنی ٹیم کا اعلان کیا جو مارچ میں اردن اور ازبکستان میں دوستانہ میچ کھیلے گی۔ ڈینربی کی ٹیم 17 سے 22 مارچ تک اردن اور 23 سے 29 مارچ تک ازبکستان میں میزبان ٹیموں سے کھیلے گی۔ بھارت کو اے ایف سی ویمنز اولمپک کوالیفائر کے راؤنڈ ون کی تیاری کے لیے یہ میچز کھیلنے ہیں۔ بھارت کو 4 سے 10 اپریل تک منعقد ہونے والے اے ایف سی اولمپک کوالیفائر میں میزبان کرغز جمہوریہ اور ترکمانستان کے ساتھ گروپ جی میں شامل کیا گیا ہے۔

اولمپک کوالیفائرز کے پہلے راؤنڈ کے سات گروپ فاتحین کا مقابلہ اکتوبر میں دوسرے مرحلے میں ایشیا کی پانچ اعلیٰ درجہ کی ٹیموں ڈی پی آر کوریا، جاپان، آسٹریلیا، چین اور جمہوریہ کوریا سے ہوگا۔ واضح رہے کہ اس ہفتہ بھارتی مردوں کی فٹ بال ٹیم کے کوچ ایگور اسٹیمک نے کولکتہ میں شروع ہونے والے تربیتی کیمپ کے لیے 23 رکنی اسکواڈ کا اعلان کیا تھا۔ بھارتی ٹیم کولکتہ میں پانچ روزہ کیمپ میں حصہ لے گی جس کے بعد وہ 22 سے 28 مارچ تک کھمان لمپک اسٹیڈیم میں سہ ملکی بین الاقوامی فٹ بال ٹورنامنٹ کھیلنے امپھال روانہ ہوگی۔

بھارتی ٹیم:

گول کیپر: سومیا نارائنسامی، شریا ہوڈا اور ایلانگبم پنتھوئی چانو۔ ڈیفنڈرز: اشلتا دیوی لوئتنگبم، سویٹی دیوی نگنگبم، ریتو رانی، رنجنا چانو سوروکھائیبم، مشیل کاسٹانہا، ڈالیما چھیبر، منیشا پنا اور جولی کشن۔ مڈ فیلڈرز: شلکی دیوی ہیمم، انجو تمانگ، اندومتی کتھیرسن، سنگیتا باسفور، روجا دیوی اسیم، کارتیکا انگاموتھو اور کشمیرا۔ فارورڈز: گریس ڈانگمی، رینو، کرشمہ شروائیکر، سندھیا رنگناتھن اور اپرنا نرجاری۔

یو این آئی