بھارتی ٹیبل ٹینس کھلاڑی بھاوینا پٹیل کو ٹوکیو پیرالمپکس میں ہوئے خواتین سنگلز کے فائنل میں دنیا کی نمبر ایک چین کی پیڈلر ینگ ژاؤ سے ہارنے کے بعد چاندی کے تمغے پر ہی اکتفا کرنا پڑا۔
ٹوکیو پیرالمپکس 2020 میں یہ بھارت کا پہلا تمغہ ہے۔
اس کے ساتھ ہی بھاوینا پیرالمپکس میں تمغہ جیتنے والی پہلی بھارتی ٹیبل ٹینس کھلاڑی بھی بن گئیں۔ وہ دیپا ملک (2016 میں) کے بعد پیرالمپکس میں تمغہ جیتنے والی دوسری ہندوستانی خاتون ہیں۔
بھاوینا پٹیل کو بالی ووڈ ستاروں اور سیاسی رہنماؤں کا مبارکباد ٹوکیو پیرالمپکس کے ٹیبل ٹینس میں بھاوینا پٹیل کے چاندی کا تمغہ جیتنے کے ساتھ ہی انھیں مبارکباد دینے کا سلسلہ بھی شروع ہوگیا ہے۔
بالی ووڈ کے ستاروں سمیت سیاسی رہنماؤں نے بھی سلور مڈلیسٹ بھاوینا پٹیل کو سوشل میڈیا کے ذریعہ مبارک بادی پیش کی ہے۔
بھاوینا کے والد نے کہا ہے کہ ان کی بیٹی نے ملک کا نام روشن کیا ہے۔وہ سونے کا تمغہ نہیں لا سکی لیکن ہم چاندی کے تمغے سے بھی خوش ہیں۔ جب وہ واپس گھر آئے گی تو ہم اس کا شاندار استقبال کریں گے۔
وزیر اعظم نریندر مودی نے چاندی کا تمغہ جیتنے پر بھاوینا پٹیل کو ٹویٹ کرکے مبارک باد دی۔ پی ایم نے ٹویٹ کیا۔ بھاوینا پٹیل نے تاریخ رقم کی ہے، بھاوین نے تاریخی چاندی کا تمغہ جیتا ہے، اس کے لیے مبارکباد، اس کی زندگی کا سفر حوصلہ افزا ہے اور اس کی کامیابی زیادہ نوجوانوں کو کھیلوں کی طرف راغب کرے گی۔
Paralympics: بھاوینا پٹیل نے خواتین سنگلز میں جیتا سلور میڈل، وزیراعظم کی مبارکباد
وہیں صدر جمہوریہ رام ناتھ کووند نے بھی ٹویٹ کرکے پیرا ٹیبل ٹینس کھلاڑی بھاوینا پٹیل کو مبارکباد دی۔ انہوں نے کہا کہ 'آپ کے غیرمعمولی عزم اور مہارت نے ہندوستان کا سر بلند کیا ہے۔ آپ کو اس غیر معمولی کامیابی پر مبارکباد۔
بھاوینا کی اس تاریخی کامیابی پر انڈین پیرالمپک کمیٹی کی صدر دیپا ملک نے کہا ہے کہ بھاوینا پٹیل کے چاندی کے تمغے نے تاریخ رقم کی ہے اور وہ بھی قومی کھیلوں کے دن۔
انہوں نے کہا کہ میرے لیے اس سے بڑی خوشی کی کیا بات ہوگی کہ ایک خاتون کھلاڑی نے تمغے کا کھاتہ کھولا ہے اور وہ خاتون کھلاڑی بھی ایسی ہے جو وہیل چیئر استعمال کرتی ہے۔
کانگریس کے رکن پارلیمنٹ راہل گاندھی نے بھی بھاوینا پٹیل کو مبارکباد دی ہے اور کہا ہے کہ آپ نے ملک کا سر فخر سے بلند کیا ہے۔
بھاوینا نے اپنا تمغہ ملک کے نام وقف کرتے ہوئے اس تاریخی کامیابی کے لیے اپنے کوچ ، خاندان کے افراد اور دوستوں کا شکریہ ادا کیا ہے۔
