مغربی بنگال کے ندیا ضلع میں واقع کلیانی میونسپل اسٹیڈیم میں میزبان محمڈن اسپورٹنگ اور رئیل کشمیر ایف سی کا مقابلہ ہوا جس میں ریئل کشمیر نے بازی مار لی۔
محمڈن اسپورٹنگ اور رئیل کشمیر ایف سی کے کھلاڑیوں نے جارحانہ انداز میں کھیل کا آغاز کیا اور ایک دوسرے پر سبقت حاصل کرنے کے لیے پے در پے حملے کئے۔
کھیل کے 33 ویں منٹ پر ڈی فاروق بھٹ نے گول کرکے رئیل کشمیر ایف سی کو ایک صفر کی سبقت دلائی۔
پہلے ہاف کے اختتام تک محمڈن اسپورٹنگ کی ٹیم کی جانب سے اسکور کرنے کی کافی کوشش کی لیکن انہیں کامیابی نہیں ملی۔
دوسرے ہاف میں بھی دونوں ٹیموں نے جارحانہ انداز اپنایا۔ کھیل کے 50 ویں منٹ پر رابررٹسن نے پنالٹی کو گول میں تبدیل کرکے رئیل کشمیر ایف سی کو 0-2 کی سبقت دلادی جبکہ 72 ویں منٹ میں مانجی پیڈرو نے گول کرکے محمڈن اسپورٹنگ کو میچ میں واپس آنے کی راہ ہموار کی لیکن یہ اسکور میچ ختم ہونے تک برقرار رہا۔
رئیل کشمیر ایف سی نے 1-2 سے جیت درج کرتے ہوئے پانچویں پوزیشن کے ساتھ آئی لیگ میں اپنی مہم کا اختتام کیا جبکہ محمڈن اسپورٹنگ کو پلے آف راؤنڈ میں آخری پوزیشن پر اکتفا کرنا پڑا۔
اس جیت کے ساتھ رئیل کشمیر ایف سی 15 میچوں میں 21 پوائنٹ کے ساتھ پانچویں پوزیشن پر رہی جبکہ محمڈن اسپورٹنگ اتنے ہی میچوں میں 20 پوائنٹ کے ساتھ آخری مقام پر رہی۔
