کلکتہ فٹبال لیگ 2021: محمڈن اسپورٹنگ کو شکست کا سامنا

بھوانی پور ایف سی نے محمڈن اسپورٹنگ کو کلکتہ فٹبال لیگ 2021 کے دلچسپ اور سنسنی خیز مقابلے میں 2-0 گول سے شکست دے کر پوائنٹس ٹیبل میں پہلی پوزیشن حاصل کر لی ہے۔

مغربی بنگال کے شمالی 24 پرگنہ کے نئی ہٹی میں واقع بنکم چند فٹبال اسٹیڈیم میں کلکتہ فٹبال لیگ 2021 کے پریمیئر ڈویژن گروپ اے میں محمڈن اسپورٹنگ اور بھوانی پور ایف سی کے درمیان دلچسپ مقابلہ ہوا جس میں محمڈن اسپورٹنگ کو غیر متوقع آزمائش سے دو چار ہونا پڑا۔

کھیل کے 12 ویں منٹ پر سورج منڈل نے گول کرکے بھوانی پور ایف سی کو ایک صفر کی سبقت دلائی۔

ایک گول سے پچھڑنے کے بعد محمڈن اسپورٹنگ کی ٹیم میچ میں واپس آنے کی جدوجہد کرتی دکھائی دی لیکن اس کی تمام کوششیں ناکام ثابت ہوئیں۔

اس کے بعد 14 ویں منٹ میں نائجیریائی فٹبالر ہنری کیسکے نے گول کرکے بھوانی پور ایف سی کا اسکور 0-2 کر دیا جو کھیل ختم ہونے تک برقرار رہا۔

اس میچ میں جیت کے ساتھ ہی بھوانی پور ایف سی نے کلکتہ فٹبال لیگ کے پوائنٹس ٹیبل میں سرفہرست مقام حاصل کر لیا ہے۔

بھوانی پور ایف سی آٹھ پوائنٹ کے ساتھ پہلی پوزیشن پر ہے جبکہ یونائٹیڈ ایس سی، محمڈن اسپورٹنگ اور بی ایس ایس اسپورٹنگ کلب سات سات پوائنٹ کے ساتھ بالترتیب دوسرے، تیسرے اور چوتھے مقام پر ہے۔