دبئی: بین الاقوامی اور بھارتی کرکٹ سے ریٹائرمنٹ لینے والے یوسف پٹھان اگلے ماہ متحدہ عرب امارات میں شروع ہونے والی انٹرنیشنل لیگ ٹی 20 کے افتتاحی سیزن میں دبئی کیپٹلس کے لیے کھیلیں گے۔ کیپٹلز نے پیر کو یہ اطلاع دی۔ ستمبر میں بھارتی کرکٹ سے ریٹائرمنٹ کا اعلان کرنے والے رابن اتھپا بھی کیپٹلز میں شامل ہوچکے ہیں۔ اپنی ریٹائرمنٹ کا اعلان کرتے ہوئے اتھپا نے کہا تھا کہ وہ اپنی زندگی کا ایک نیا مرحلہ شروع کرنے کے منتظر ہیں۔ قابل ذکر ہے کہ بورڈ آف کنٹرول فار کرکٹ ان انڈیا (بی سی سی آئی) کے قوانین کے مطابق بورڈ سے وابستہ کوئی بھی کھلاڑی غیر ملکی لیگز میں حصہ نہیں لے سکتا اور ایسا کرنے کے لیے اسے بھارتی کرکٹ سے ریٹائر ہونا پڑتا ہے۔ Uthappa and Yusuf Pathan To play in ILT20
سنہ 2006 میں بھارت کے لیے ڈیبیو کرنے والے اتھپا 46 ون ڈے اور 13 ٹی 20 انٹرنیشنل کھیل چکے ہیں۔ اس کے علاوہ انہوں نے چھ مختلف ٹیموں کے لیے کھیلتے ہوئے 205 آئی پی ایل میچوں میں بھی حصہ لیا اور چنئی سپر کنگز کے ساتھ 2021 میں خطاب جیتنے کے بعد ستمبر 2022 میں ریٹائرمنٹ کا اعلان کردیا۔ دوسری جانب 40 سالہ یوسف نے اپنے انٹرنیشنل کیریئر میں 57 ون ڈے اور 22 ٹی ٹوئنٹی میچ کھیلے۔ وہ پہلا آئی پی ایل جیتنے والی راجستھان رائلز کے اہم کھلاڑی تھے اور فائنل میں مین آف دی میچ کا ایوارڈ بھی جیتا تھا۔