ڈریسنگ روم میں وزیراعظم نریندر مودی نے محمد شامی کو گلے لگایا

آئی سی سی منز ورلڈ کپ 2023 کے فائنل میں آسٹریلیا کے ہاتھوں شکست کے بعد وزیراعظم نریندر مودی نے بھارتی کرکٹ ٹیم کے ڈریسنگ روم میں گئے اور تمام کھلاڑیوں کی حوصلہ افزائی کی اس دوران وزیراعظم نے فاسٹ بالر محمد شامی کو گلے بھی لگایا۔ PM Modi Hug Mohammad Shami

احمدآباد: آئی سی سی ورلڈ کپ 2023 کے فائنل میں آسٹریلیا کے ہاتھوں شکست کے بعد جب پورا ملک افسوس کا اظہار کر رہا تھا اسی وقت وزیراعظم نریندر مودی بھارتی کرکٹ ٹیم کے ڈریسنگ روم میں گئے۔ انہوں نے کھلاڑیوں سے ملاقات کی اور ان کی حوصلہ افزائی کی۔ بھارتی کرکٹ ٹیم کے فاسٹ بالر محمد شامی نے ایکس پر اس کی جانکاری دیتے ہوئے تصویر شئیر کی۔

تصویر میں وزیر اعظم نریندر مودی محمد شامی کو اپنے گلے سے لگاکر ان کی حوصلہ افزائی کی۔ محمد شامی نے سوشل میڈیا پلیٹ فارم ایکس پر مودی کی طرف سے تسلی اور گلے ملنے کی تصویر شیئر کرتے ہوئے لکھا کہ بدقسمتی سے کل ہمارا دن نہیں تھا۔ میں تمام بھارتیوں کا شکریہ ادا کرنا چاہوں گا جنھوں نے پورے ٹورنامنٹ میں ہماری ٹیم اور مجھے سپورٹ کیا۔ خاص طور پر پی ایم مودی کا شکریہ جنھوں نے ڈریسنگ روم میں ہمارا حوصلہ بلند کرنے تشریف لائے۔

اسپنر رویندرا جڈیجہ نے بھی سوشل میڈیا پلیٹ فارم ایکس پر لکھا کہ ہم نے ایک زبردست ٹورنامنٹ کھیلا لیکن ہم کل اسے کامیابی کے ساتھ ختم نہیں کرسکے۔ ہم سب کے دل ٹوٹے ہوئے ہیں لیکن ہمارے لوگوں کا سپورٹ ہمیں جاری رکھے ہوئے ہے۔ کل وزیراعظم مودی کا ڈریسنگ روم کا دورہ کرنا ہامرے لیے خاص اور بہت حوصلہ افزا تھا۔

اس سے قبل وزیراعظم نے بھارتی ٹیم کے فائنل میں شکست کے فورا بعد ٹویٹ کیا تھا کہ پیاری ٹیم انڈیا، ورلڈ کپ میں آپ کی صلاحیت اور عزم قابل دید تھا ۔آپ نے بڑے جذبے سے کھیلا اور قوم کو آپ پر فخر ہے، ہم آج اور ہمیشہ آپ کے ساتھ کھڑے ہیں۔

قابل ذکر ہے کہ محمد شامی پورے ٹورنامنٹ میں شاندار کارکردگی کا مظاہرہ کرتے ہوئے کل 23 وکٹ لے کر سرفہرست تھے لیکن سب سے اہم فائنل میچ میں صرف ایک وکٹ لینے میں کامیاب رہے۔ تیز گیند باز نے نیوزی لینڈ کے خلاف یمی فائنل میں 7 وکٹیں حاصل کیں تھی، جو ون ڈے کرکٹ میں کسی بھی بھارتی کھلاڑی کی بہترین گیندبازی ہے۔تاہم فائنل میں ٹیم انڈیا آسٹریلیا کو شکست نہ دے سکی۔ پہلے بیٹنگ کرتے ہوئے بھارت نے صرف 240 رنز ہی بنائے جس کو آسٹریلیا نے بآسانی 43 اوورز میں 4 وکٹ کھو کر حاصل کرلیا۔

یہ بھی پرھیں:کیا ٹیم انڈیا عالمی کرکٹ کے نئے چوکرس ہیں؟