بلاوایو: ٹاس ہارنے کے بعد بیٹنگ کرتے ہوئے اسکاٹ لینڈ 50 اوور میں صرف 234 رن ہی بنا سکی لیکن اس نے زمبابوے کو 41.1 اوور میں 203 رن پر آل آؤٹ کرکے حیران کن فتح درج کی۔ کرس سول نے سات اوورز میں 33 رن دے کر تین وکٹیں حاصل کیں جبکہ برینڈن میک ملن اور مائیکل لیسک نے دو دو کامیابیاں حاصل کیں۔ صفیان شریف، مارک واٹ اور کرس گریوز نے ایک ایک وکٹ حاصل کی۔ بظاہر معمولی ہدف کا تعاقب کرتے ہوئے زمبابوے نے سول کی دلکش باؤلنگ کے سامنے گھٹنے ٹیک دیئے۔ سول نے اننگز کی پہلی گیند پر اوپنر جویلورڈ گمبی کو آؤٹ کرنے کے بعد کپتان کریگ ارون (دو) اور ٹورنامنٹ کے بہترین بلے باز شان ولیمز (12) کو بھی آؤٹ کیا۔
سکندر رضا (40 گیندوں، 34 رن) کی صورت میں پانچویں وکٹ کے گرنے کے بعد زمبابوے کی مشکلات میں اضافہ ہوگیا۔ ریان برل نے ویسلے مادھویرے کے ساتھ 73 رن کی شراکت داری کی تاہم ان دونوں کی جدوجہد زمبابوے کو فتح سے ہمکنار نہ کر سکی۔ مادھویرے نے 39 گیندوں پر تین چوکوں اور ایک چھکے کی مدد سے 40 رن بنائے جبکہ برل نے 84 گیندوں پر آٹھ چوکوں اور ایک چھکے کی مدد سے 83 رن بنائے۔