Rishabh Pant's First Social Media Post سڑک حادثے کے بعد رشبھ پنت کا پہلا ٹوئٹ، میری سرجری کامیاب رہی

ٹیم انڈیا کے وکٹ کیپر بلے باز رشبھ پنت ممبئی کے کوکیلا بین اسپتال میں زیر علاج ہیں۔ پنت نے حادثے کے بعد پہلی بار سوشل میڈیا پر پوسٹ کیا ہے۔ Rishabh Pant's First Social Media Post

نئی دہلی: ٹیم انڈیا کے وکٹ کیپر بلے باز رشبھ پنت گزشتہ برس ایک سڑک حادثے میں زخمی ہو گئے تھے۔ پنت اپنی مرسڈیز کار کے ذریعے اپنے گھر روڑکی جا رہے تھے کہ جب ان کے ساتھ یہ حادثہ ہوا۔ حادثے کے بعد رشبھ پنت کا پہلے دہرادون کے میکس اسپتال میں علاج کیا گیا۔ اس کے بعد انہیں ممبئی کے کوکیلا بین اسپتال منتقل کیا گیا۔ اب رشبھ پنت نے حادثے کے بعد پہلی بار سوشل میڈیا پر پوسٹ کیا ہے۔ پنت نے بتایا ہے کہ ان کی سرجری کامیاب رہی ہے اور وہ آنے والے چیلنجوں کے لیے تیار ہیں۔ پنت نے اس مشکل وقت میں ان کا ساتھ دینے پر بی سی سی آئی، شائقین، حکومتی اتھارٹی کا بھی شکریہ ادا کیا۔ پنت جلد ہی میدان میں واپسی کرنا چاہتے ہیں۔

رشبھ پنت نے لکھا 'میں اپنے مداحوں کا تہہ دل سے شکرگزار ہوں اور یہ بتاتے ہوئے خوشی محسوص کررہا ہے کہ میری سرجری کامیاب رہی۔ بحالی کا راستہ شروع ہو چکا ہے اور میں آنے والے چیلنجوں کے لیے تیار ہوں۔ بی سی سی آئی، جے شاہ اور حکومتی اتھارٹی کا شکریہ۔ اپنے مداحوں کو مخاطب کرتے ہوئے انہوں نے کہاکہ"میں دل کی گہرائیوں سے اپنے تمام مداحوں، ٹیم کے ساتھیوں، ڈاکٹروں اور فزیوز کا بھی شکریہ ادا کرنا چاہتا ہوں۔‘‘

رشبھ پنت کی کوکیلابین ہسپتال میں لگمنٹ ری کنسٹرکشن سرجری ہوئی تھی۔ اب رشبھ پنت کی اگلے چھ ہفتوں میں ایک اور سرجری ہونے کی امید ہے۔ ایسے میں وکٹ کیپر بلے باز کے اکتوبر نومبر میں ہونے والے آئی پی ایل اور ایشیا کپ کے ساتھ ساتھ ون ڈے ورلڈ کپ سے بھی باہر ہونے کا امکان ہے۔

کار حادثے کے بعد میکس اسپتال میں پنت کے دماغ اور ریڑھ کی ہڈی کا ایم آر آئی کیا گیا، لیکن سوجن اور درد کی وجہ سے ان کے گھٹنے اور ٹخنے کا ایم آر آئی نہیں ہو سکا۔ ایسا لگتا ہے کہ پنت کو ٹخنے اور گھٹنے دونوں کی سرجری کی ضرورت ہوگی۔ گھٹنے کے لگمنٹ سرجری سے صحت یاب ہونے میں عام طور پر 6-8 ماہ لگتے ہیں۔ اس حادثے میں رشبھ پنت کا بچ جانا کسی کرشمہ سے کم نہیں تھا۔ ان کی کار ڈیوائیڈر سے ٹکرا گئی جس کے بعد اس میں آگ لگ گئی۔ پنت کسی طرح گاڑی سے باہر نکلنے میں کامیاب ہوئے۔ ہریانہ روڈ ویز کے بس ڈرائیور سشیل نے اس کی مدد کی۔