احمد آباد: نریندر مودی اور ان کے ہم منصب آسٹریلوی وزیر اعظم انتھونی البانیس احمد آباد کے نریندر مودی اسٹیڈیم میں بھارت اور آسٹریلیا کے درمیان چوتھے ٹیسٹ میچ کے پہلے دن کا کھیل دیکھیں گے۔ یہ پہلا موقع ہوگا، جب وزیراعظم نریندر مودی اپنے نام سے منسوب اسٹیڈیم میں میچ دیکھیں گے۔ میڈیا رپورٹس میں کہا گیا ہے کہ گجرات حکومت دنیا کے سب سے بڑے کرکٹ اسٹیڈیم میں دونوں وزرائے اعظم کی میزبانی کے لیے سیکورٹی کے وسیع انتظامات کر رہی ہے۔ بارڈر گواسکر ٹرافی سیریز کا چوتھا ٹیسٹ میچ 9 سے 13 مارچ تک کھیلا جانا ہے۔ گزشتہ برس مئی میں آسٹریلیا کے وزیر اعظم بننے کے بعد انتھونی البانی کا یہ پہلا بھارت کا دورہ ہے۔
ذرائع کے مطابق البانی 8 مارچ کے آس پاس آسٹریلیا سے اڑان بھریں گے۔ وہ اور وزیر اعظم نریندر مودی بھارت اور آسٹریلیا کے درمیان چوتھا کرکٹ ٹیسٹ میچ دیکھنے کے لیے احمد آباد جا سکتے ہیں۔ وزیر خارجہ ایس جے شنکر نے آسٹریلیا کے وزیر اعظم کے دورہ بھارت کی تیاری کے لیے گزشتہ ہفتے آسٹریلیا کا دورہ کیا۔ ویسے اس دورے کے حوالے سے ابھی تک کوئی باضابطہ اعلان نہیں کیا گیا ہے۔ تاہم البانی نے ہفتہ کے روز جے شنکر سے ملاقات کے بعد ایک ٹویٹ میں اپنے بھارت کے دورے کا ذکر کیا۔ انہوں نے لکھاکہ اگلے ماہ بھارت کے دورے سے پہلے @DrSJaishankar سے ملنا بہت اچھا لگا۔ ہم نے اپنی تزویراتی شراکت داری، اقتصادی مواقع اور عوام سے عوام کے تعلقات پر تبادلہ خیال کیا جو دنوں ممالک کے درمیان تعلقات کو مضبوط بناتے ہیں۔