IPL 2023 کم رنز کا دفاع کرنے میں گجرات کامیاب، لکھنؤ کو سات رنوں سے شکست

آئی پی ایل 2023 کے 30ویں میچ میں گجرات ٹائٹنز اور لکھنؤ کے درمیان سخت مقابلہ ہوا۔ اس میچ میں دونوں ٹیموں کے کپتان ہاردک اور کے ایل راہول کے بلے سے شاندار ففٹی دیکھنے کو ملی۔ IPL 2023

نئی دہلی: اپنے چھٹے میچ میں گجرات ٹائٹنز نے اپنے ہوم گراؤنڈ پر لکھنؤ کی ٹیم کا مقابلہ کیا۔ پہلے بیٹنگ کرتے ہوئے گجرات کی ٹیم تیز شروعات نہیں کر سکی۔ نوجوان بلے باز شبمن گل صفر پر آؤٹ ہو کر پویلین لوٹ گئے۔ کپتان ہاردک پانڈیا اور ریدھیمان ساہا نے ذمہ داری نبھاتے ہوئے شاندار اننگز کھیلی۔ ان کے علاوہ کوئی بھی بلے باز دوہرا ہندسہ عبور نہ کرسکا۔

گجرات کے اوپننگ بلے باز ریدھیمان ساہا اپنی نصف سنچری سے صرف 3 رنز دور رہے، لیکن ہاردک پانڈیا نے ٹیم کی امیدوں کو زندہ رکھا۔ انہوں نے سمجھداری کے ساتھ بلے بازی کی اور 66 رنز کی شاندار اننگز کھیلی۔ ہاردک کی اننگز میں 2 چوکے اور 4 چھکے شامل تھے جس کے بعد گجرات نے لکھنؤ کے سامنے 136 رنز کا ہدف دیا۔ لکھنؤ کی بلے بازی شروع ہوتے ہی میچ یک طرفہ نظر آیا۔ کائل میئرز اور کے ایل راہل نے مشکل پچ پر اپنی ٹیم کو اچھی شروعات دلائی، لیکن اننگز کے اختتام پر موہت شرما نے کھیل ہی پلٹ دیا۔

لکھنؤ کی ٹیم کو آخری اوور میں 12 رنز درکار تھے، اور گیند تیز گیندباز موہت شرما کے ہاتھ میں تھی۔ اس کھلاڑی نے آخری اوور میں میچ کا رخ ہی پلٹ دیا۔ انہوں نے پہلے کپتان کے ایل راہل کو 68 رنز پر پویلین بھیجا۔ اس کے بعد مارکس سٹوئنس کو بھی پہلی گیند پر ہی چلتا کیا۔ اسی دوران آیوش بدونی اور دیپک ہوڈا اوور کی چوتھی اور پانچویں گیند پر رن ​​آؤٹ ہو کر پویلین لوٹ گئے۔ اس میچ میں افغانستانی کھلاڑی نور احمد نے چار اوورز میں 18 رنز دے کر دو اہم وکٹ لیے اور گجرات کی جیت میں اہم کردار ادا کیے۔ گجرات نے یہ میچ 7 رنز سے جیتا۔ گزشتہ میچ میں شکست کا سامنا کرنے کے بعد گجرات نے شاندار واپسی کی۔