IPL 2022: سن رائزرس حیدر آباد کی پنجاب پر شاندار جیت

آئی پی ایل 28ویں میچ میں سن رائزرس حیدر آباد نے پنجاب کنگز کو 7 وکٹوں سے شکست دی، اس کے ساتھ ہی حیدر آباد کے 8 پوائنٹس ہوگئے اور وہ چوتھے نمبر پر پہنچ گئی ہے، بہترین گیند بازی کے لیے عُمران ملک کو مین آف دی میچ کے اعزاز سے نوازا گیا۔ SRH Beat PBKS by 7 Wickets

ممبئی کے ڈی وائی پاٹل اسٹیڈیم میں کھیلے گئے میچ میں پنجاب کنگز نے پہلے بلے بازی کرتے ہوئے مقررہ 20 اوورز میں 151 رنز بنائے تھے جسے سن رائزرس حیدر آباد نے 18.5 اوورز میں محض 3 وکٹوں پر ہی حاصل کر لیا۔ ہدف کا تعاقب کرنے اتری سن رائزرس حیدر آباد کا آغاز اچھی نہیں رہا اور محض 14 رنز کے مجموعی اسکور کپتان کین ولیمسن 3 رنز بنا کر پویلین لوٹ گئے، انہیں کگیسو رباڈا نے شکھر دھون کے ہاتھوں آؤٹ کیا۔ اس کے بعد ابھیشیک شرما اور راہل ترپاٹھی نے 48 رنز کی پارٹنرزشپ کر کے ٹیم کو ابتدائی بحران سے نکالا، 62 رنز کے مجموعی اسکور پر راہل ترپاٹھی آؤٹ ہوگئے، انہوں نے 22 گیندوں میں 34 رنز بنائے جب کہ ابھیشیک شرما نے 25 گیندوں میں 31 رنز کی اننگ کھیلی۔ Punjab Kings vs Sunrisers Hyderabad

ان دونوں کے آؤٹ ہونے کے بعد ایڈن مارکرم اور نکولس پورن نے 75 رنز کی پارٹنرشپ کر کے ٹیم کو فتح سے ہمکنار کیا، ایڈن مارکرم نے 27 گیندوں میں 4 چوکوں اور ایک چھکے کی مدد سے 41 رنز اور پورن نے 30 گیندوں میں 35 رنز بنائے۔ پنجاب ک جانب سے راہل چہر نے دو اور کگیسو رباڈا نے ایک بلے باز کو آؤٹ کیا۔

اس سے قبل سن رائزرز حیدرآباد کے تیز گیند بازوں بھونیشور کمار (3/22) اور عمران ملک (4/28) نے خطرناک گیند بازی کرتے ہوئے پنجاب کنگز کو مقررہ 20 اووروں میں 151 رنز پرسمیٹ دیا تھا۔ حیدرآباد نے ٹاس جیت کر پہلے گیند بازی کرنے کا فیصلہ کیا۔ بھونیشور نے پنجاب کے ٹاپ آرڈر کو نمٹایا جبکہ ملک نے نچلے آرڈر کو چلتا کیا۔ لیام لیونگسٹن پنجاب کے واحد بلے باز تھے جنہوں نے آزادانہ طور پر کھیلا۔ لیونگسٹون نے 33 گیندوں پر 60 رنز میں پانچ چوکے اور چار چھکے لگائے۔

اس کے علاوہ شاہ رخ خان نے 28 گیندوں پر ایک چوکا اور دو چھکوں کی مدد سے 26 رنز بنائے۔ اوڈین اسمتھ نے 15 گیندوں کاسامنا کیا اور ایک چھکے کی مدد سے 13 رنز بنائے۔ پربھسمرن سنگھ نے 11 گیندوں میں 14 اور جانی بیرسٹو نے 10 گیندوں میں 12 رنز بنائے۔ حیدر آباد کی جانب سے مین آف دی میچ عُمران ملک نے شاندار گیند بازی کی اور 4 بلے بازوں کو آؤٹ کیا جب کہ بھونیشور کُمار نے 3 وکٹیں حاصل کیں اس کے علاوہ ٹی نٹراجن اور سُچیت کے حصے میں ایک ایک وکٹ آئی۔