آئی پی ایل 2021: ممبئی انڈینز کی نگاہیں خطاب کی ہیٹ ٹرک پر

کل یعنی 9 اپریل سے انڈین پریمیئر لیگ (آئی پی ایل) کے 14 ویں ایڈیشن کا آغاز ممبئی انڈیئز اور رائل چیلینجرز بنگلور کے مابین میچ سے ہوگا۔

آئی پی ایل 2021 کا پہلا مقابلہ بھارتی کرکٹ ٹیم کے کپتان وراٹ کوہلی اور نائب کپتان روہت شرما کی ٹیموں کے مابین کھیلا جائے گا۔

آئی پی ایل کی سب سے کامیاب ٹیم ممبئی انڈینز کے کپتان روہت شرما پر جہاں اس ٹورنامنٹ میں اپنی بادشاہت برقرار رکھنے کا دباؤ ہوگا تو وہیں، وراٹ اینڈ کمپنی پہلی بار آئی پی ایل خطاب پر قبضہ کرنے کے ارادے سے اترے گی۔

اس کے علاوہ سب کی نگاہیں تجربہ کار مہندر سنگھ دھونی پر مرکوز ہوں گی کیوں کہ اس ٹورنامنٹ کی تاریخ میں پہلی بار ایسا ہوا تھا کہ چنئی سُپر کنگز پلے آف میں جگہ بنانے میں ناکام ہوئی تھی اور اب دیکھنا یہ ہوگا کہ دھونی کس طرح کی حکمت عملی کے ساتھ میدان میں اتریں گے۔

کورونا وائرس کے بڑھتے معاملات کی وجہ سے ٹورنامنٹ محفوظ ماحول میں منعقد ہوگا جبکہ میچ کے دوران شائقین کو اسٹیڈیم میں داخلے کی اجازت نہیں ہوگی۔

صرف پانچ مہینوں میں دو آئی پی ایل ٹورنامنٹ ہونے سے شائقین میں کافی جوش دیکھنے کو مل رہا ہے کیوں کہ بھارت میں آئی ایل کو جنون کی حد تک پسند کیا جاتا ہے یا یوں کہیے کہ آئی پی ایل ایک تہوار کی مانند ہے۔

گزشتہ سیزن کی طرح یہ ٹورنامنٹ بھی کورونا وائرس کی زد میں ہے اور لیگ کے آغاز سے قبل کچھ کھلاڑی اور معاون عملہ کورونا مثبت پایا گیا ہے لیکن بی سی سی آئی اس بات سے پُرامید ہے کہ گزشتہ سیزن کی طرح رواں برس بھی ٹورنامنٹ آسانی کے ساتھ ہوگا۔