آئی پی ایل 2020: حیدرآباد سے چنئی کو شکست

چنئی سپرکنگس کے کپتان مہندر سنگھ دھونی آخری اوور میں کوئی کرشمہ نہیں دکھا سکے اور سن رائزرس حیدرآباد نے چنئی کو آئی پی ایل مقابلہ میں جمعہ کو سات رن سے ہرا کر ٹورنامنٹ میں اپنی دوسری جیت درج کی۔

حیدرآباد نے نوجوان بلے باز پریم گرگ (ناٹ آوٹ 51) اور ابھیشیک شرما (31) کی شاندار بلے بازی اور ان کے مابین پانچویں وکٹ کے لئے 77رنز کی اہم شراکت داری کی بدولت 20 اوورز میں پانچ وکٹ پر 164 رن کا چیلنجنگ اسکور بنایا۔

رویندر جڈیجہ نے پچاس رن اور کپتان دھونی نے ناٹ آوٹ 47 رنز بنائے لیکن چنئی کی ٹیم پانچ وکٹ پر 157 رنز تک ہی پہنچ سکی۔

دھونی نے 36گیندوں میں ناٹ آوٹ 47 رنز بنائے لیکن میچ کو آخر میں فنش نہیں کر سکے اور ان کی ٹیم کو شکست کا سامنا کرنا پڑا۔ دھونی کی سست بلے بازی ٹیم کو آخر میں بھاری پڑگئی۔

حیدرآباد کی چار میچوں میں یہ دوسری جیت ہے جبکہ چنئی کو چار میچوں میں تیسری شکست کا سامنا کرنا پڑا۔