Inzamam ul Haq resigns انضام الحق کا چیف سلیکٹر کے عہدے سے استعفیٰ

پاکستان کرکٹ ٹیم کے چیف سلیکٹر انضمام الحق پر مفادات کے تصادم کا الزام عائد ہونے کے بعد پاکستان کرکٹ بورڈ نے تحقیقات کے لیے پانچ رکنی کمیٹی تشکیل دے دی ہے جس کے بعد انضمام حق نے تحقیقات مکمل ہونے تک چیف سلیکٹر کے عہدے سے استعفیٰ دے دیا ہے۔

اسلام آباد: پاکستان کے سابق کپتان انضمام الحق نے بھارت میں ہونے والے کرکٹ ورلڈ کپ 2023 میں ٹیم کی خراب کارکردگی کے درمیان چیف سلیکٹر کے عہدے سے استعفیٰ دے دیا ہے۔ انضمام الحق کا استعفیٰ اس وقت سامنے آیا ہے جب ان پر مفادات کے تصادم کا الزام عائد کیا گیا ہے۔ پی سی بی نے ٹویٹ کیا کہ پاکستان کرکٹ بورڈ (پی سی بی) نے ٹیم کے انتخاب کے عمل سے متعلق میڈیا میں رپورٹ کیے گئے مفادات کے ٹکراؤ کے حوالے سے الزامات کی تحقیقات کے لیے پانچ رکنی فیکٹ فائنڈنگ کمیٹی قائم کر دی ہے۔کمیٹی اپنی رپورٹ اور کوئی بھی سفارشات پی سی بی انتظامیہ کو جلد پیش کرے گی۔

ایک پاکستانی میڈیا چینل میں گفتگو کرتے ہوئے انضمام الحق نے استعفے کی تصدیق کی اور کہا کہ جب مجھ پر الزامات لگے تو میں نے بورڈ سے بات کی تھی اور کہا تھا کہ اگر کوئی شک ہے تو اس پر انکوائری ہونی چاہیے۔ جس کے بعد بورڈ نے مجھے بتایا کہ ہم نے 5 رکنی کمیٹی بنا دی ہے۔ تو میں نے بہتر سمجھا کی تحقیقیات مکمل ہونے تک مستعفی ہوجاتا ہوں اور تمام چیزیں واضح ہونے کے بعد پی سی بی کے ساتھ دوبارہ بیٹھ جاؤں گا لیکن تب تک ہمیں انکوائری کے نتائج کا انتظار کرنا چاہیے۔

انضمام الحق نے مزید کہا کہ لوگ بغیر تحقیق کے الزامات عائد کرتے ہیں، جن کا کوئی ثبوت نہیں ہے، اس طرح کے الزامات سے دکھ ہوتا ہے۔ دراصل انضمام الحق پر یہ الزام ہے کہ وہ کرکٹرز کے ایجنٹ طلحہ رحمانی کی ملکیت والی کمپنی "Yazo International Limited" میں شیئر ہولڈر ہیں۔ طلحہ رحمانی پاکستان کے کچھ معروف کرکٹرز کی نمائندگی کرتے ہیں، جن میں بابر اعظم، محمد رضوان، اور شاہین شاہ آفریدی شامل ہیں۔

واضح رہے کہ رواں برس اگست میں سابق کپتان انضمام الحق کو پاکستان کرکٹ ٹیم کا چیف سلیکٹر مقرر کیا گیا تھا۔ انضمام الحق نے افغانستان کے خلاف سیریز، ایشیا کپ اور ورلڈکپ کے لیے پاکستانی ٹیم منتخب کی تھی۔ لیکن پاکستان کی ٹیم نے نہ تو ایشیا کپ میں اچھی کارکردگی کا مظاہرہ کیا اور نہ ہی بھارت کی میزبانی میں جاری ورلڈ کپ میں شاندار کھیل کا مظاہرہ کیا ہے۔