WTC Final بھارتی کرکٹ ٹیم نے ڈبلیو ٹی سی فائنل کے لیے شروع کی پریکٹس

بھارتی کرکٹ ٹیم کے زیادہ تر کھلاڑی آئی سی سی ورلڈ ٹیسٹ چیمپئن شپ 2023 کا فائنل کھیلنے کے لیے لندن پہنچ چکے ہیں اور ٹیم انڈیا نے ارونڈیل کیسل کرکٹ کلب میں اپنا ٹریننگ سیشن شروع کر دیا ہے۔ India vs Australia WTC Final

لندن: آئی پی ایل 2023 ختم ہوتے ہی ٹیم انڈیا کے زیادہ تر کھلاڑی آئی سی سی ورلڈ ٹیسٹ چیمپئن شپ کا فائنل میچ کھیلنے کے لیے لندن پہنچ گئے ہیں۔ بھارتی ٹیم کے کھلاڑی پریکٹس سیشنز میں حصہ لے کر وہاں کے موسم کے مطابق خود کو ڈھالنے کی کوشش کر رہے ہیں۔ انگلینڈ کے دی اوول میں 7 جون سے 11 جون تک کھیلے جانے والے آئی سی سی ورلڈ ٹیسٹ چیمپئن شپ کا فائنل میچ بہت دلچسپ ہونے کی امید ہے۔ بی سی سی آئی کی جانب سے تصاویر اور ویڈیوز شیئر کرکے لوگوں کو ٹیم کی تیاریوں سے آگاہ کیا گیا ہے۔ لندن پہنچنے کے بعد ٹیم انڈیا نے ارونڈیل کیسل کرکٹ کلب میں ٹریننگ سیشن شروع کیا، جس میں گیند بازوں کے ساتھ ساتھ بلے بازوں نے بھی ہاتھ آزمائے۔

بولنگ کوچ پارس مہامبرے نے کہا کہ گیند بازوں کے ساتھ ساتھ بلے بازوں کی تیاری کا سیشن اچھا جا رہا ہے۔ بولرز کو ورک لوڈ کے مطابق تیار کیا جا رہا ہے۔ دوسری جانب بیٹنگ کوچ وکرم راٹھور نے کہا کہ ٹیم کے کھلاڑی آئی پی ایل جیسے مختلف فارمیٹ کھیلنے کے بعد آرہے ہیں۔ اس لیے وہ خود کو نئے ماحول میں ڈھالنے کی کوشش کر رہے ہیں۔ کچھ اچھے سیشن ہوئے ہیں اور کھلاڑی بھی اچھی تیاری کر رہے ہیں۔ بھارت کے سابق ہیڈ کوچ روی شاستری کا کہنا ہے کہ روہت شرما کی قیادت والی ٹیم آسٹریلیا کے خلاف آئندہ ورلڈ ٹیسٹ چیمپئن شپ کے فائنل کے لیے پلیئنگ الیون میں روی چندرن اشون اور رویندر جڈیجہ دونوں کو رکھ سکتی ہے۔ آف اسپنر اشون اور ٹاپ آرڈر آل راؤنڈر جڈیجہ کے علاوہ بھارت کے 15 رکنی اسکواڈ میں بائیں ہاتھ کے اسپن آل راؤنڈر اکشر پٹیل بھی شامل ہیں۔ ان میں سے صرف 2 اسپنرز پلیئنگ الیون میں کھیلیں گے۔