India Womens Cricket team ہندوستان نے دوسرا ٹی ٹوئنٹی جیت کر سیریز میں ناقابل تسخیر برتری حاصل کی

چٹگاوں میں کھیلے گئے دوسرے ٹی 20 انٹرنیشنل میچ میں بھارتی خواتین کرکٹ ٹیم نے اسپن گیندبازوں کی بدولت بنگلہ دیش کو دلچسپ اور سنسنی خیز مقابلے میں آٹھ رنوں سے شکست دے کر تین میچوں کی سیریز میں 2-0 کی ناقابل تسخیر برتری حاصل کر لی۔

ڈھاکہ: دیپتی شرما (12/3)، مینو مانی (9/2) اور شیفالی ورما (15/3) کی شاندار گیند بازی کی بدولت منگل کو سنسنی خیز مقابلے میں ہندوستان نے خواتین کے دوسرے ٹی ٹوئنٹی میں بنگلہ دیش کو آٹھ رنز سے شکست دے کر تین میچوں کی سیریز میں 2-0 کی ناقابل تسخیر برتری حاصل کر لی۔ بلے بازوں کی ناکامی کی وجہ سے ہندوستان مقررہ 20 اوورز میں آٹھ وکٹوں کے نقصان پر95 رنزہی بنا سکا لیکن گیندبازوں نے بنگلہ دیش کو 20 اوورز میں 87 رنز پر آل آؤٹ کر دیا۔

گیند بازوں کی قیادت دیپتی نے کی جنہوں نے چار اوورز میں 12 رن دے کر تین وکٹیں حاصل کیں، جس میں بنگلہ دیش کی سب سے زیادہ رنز بنانے والی کپتان نگار سلطانہ (38) کا وکٹ بھی شامل ہے۔ اپنا دوسرا ٹی ٹوئنٹی کھیلتے ہوئے منّو نے چار اوورز میں نو رنز کے عوض دو وکٹیں حاصل کیں، جبکہ بریڈی انوشا نے چار اوورز میں 20 رن دے کر ایک وکٹ لیا۔ بنگلہ دیش کو آخری اوور میں 10 رنز درکار تھے۔ شیفالی نے اس اوور میں صرف ایک رن دے کر تین وکٹ چٹکائے، جبکہ چوتھا وکٹ رن آؤٹ کے طور پر گرا اور بنگلہ دیش 87 رنز پر آل آؤٹ ہو گئی۔

بنگلہ دیش کے سامنے محض 96 رنز کا ہدف رکھنے کے بعد ہندوستان کی جیت کا دارومدار گیند بازوں پر تھا۔ ہندوستان کی شروعات اچھی نہیں رہی اور پوجا وستراکر کے پہلے ہی اوور میں بنگلہ دیش نے شمیمہ سلطانہ اور ساتھی رانی کے ایک ایک چوکے کی مدد سے 10 رنز بنائے۔ اس کے بعد اسپنروں نے ہندوستان کی قیادت سنبھالی۔ منوں نے دوسرا اوور میڈن ڈالتے ہوئے سلطانہ کا وکٹ نکالا، جبکہ دیپتی نے تیسرے اوور میں تین رن دے کر رانی کو آؤٹ کیا۔ بریڈی نے پاور پلے کے فوراً بعد مرشدہ خاتون (چار) کا وکٹ حاصل کیا، جبکہ منو نے ریتو مونی کو ایل بی ڈبلیو کر کے بنگلہ دیش کا اسکور آٹھ اوورز میں 31/4 کردیا۔

مسلسل گرتی وکٹوں کے درمیان کپتان سلطانہ نے بنگلہ دیش کی اننگ کو سنبھالا۔ انہوں نے شورنا اختر کے ساتھ پانچویں وکٹ کے لیے 34 رنز جوڑے۔ شورنا 17 گیندوں پر سات رنز بنا کر آؤٹ ہوگئیں، حالانکہ سلطانہ نے میچ کو اختتام تک لے جانے کی پوری کوشش کی۔ جب بنگلہ دیش کو 13 گیندوں پر 15 رنز درکار تھے تو ہارلین دیول نے جمائما روڈریگز کی گیند پر ان کا کیچ ڈراپ کر دیا۔ ایک وقت پر ایسا لگ رہا تھا کہ بنگلہ دیش یہ میچ جیت جائے گا، لیکن دیپتی نے 19ویں اوور میں سلطانہ کو صرف چار رنز دے کر آؤٹ کر دیا۔ سلطانہ نے 55 گیندوں پر 38 رنز بنائے اور ان کا وکٹ گرتے ہی ہندوستان کی جیت تقریباً یقینی ہوگئی۔

آخری اوور میں نئے بلے بازوں کے لیے 10 رنز بنانا آسان نہیں تھا۔ رابعہ خان پہلی ہی گیند پر رن ​​آؤٹ ہوگئیں جبکہ ناہیدہ اختر، فہیمہ خاتون اور معروفہ اختر بڑے شاٹس کھیلنے کی کوشش میں اپنی وکٹیں گنوا بیٹھیں۔اس سے قبل ہندوستان نے ٹاس جیت کر بلے بازی کا فیصلہ کیا لیکن شیر بنگلہ اسٹیڈیم کی سست پچ پر کوئی بھی بلے باز بڑی اننگ نہ کھیل سکا۔ شیفالی نے ہندوستان کی جانب سے 14 گیندوں پر چار چوکوں کی مدد سے 19 رنز بنائے جبکہ امنجوت کور نے 17 گیندوں پر 14 رنوں کی اننگ کھیلی۔

اسمرتی مندھانا نے 13 اور دیپتی نے 10 رنز کا تعاون کیا۔ کپتان ہرمن پریت کور سمیت پانچ ہندوستانی بلے باز ڈبل فیگرز کو بھی نہ چھو سکے۔ وستراکر (3 گیند، 1 چوکا، 7 رن) اور منّو (3 گیند، 1 چوکا، 5 رن) نے ناٹ آؤٹ رہتے ہوئے ہندوستان کو 95/8 تک پہنچایا۔بنگلہ دیش کی جانب سے سلطانہ خاتون نے سب سے زیادہ تین اور فہیمہ نے ایک وکٹ حاصل کی۔ معروفہ، ناہیدہ اور رابعہ کو ایک ایک وکٹ ملا۔

یواین آئی