وراٹ کوہلی کی کپتانی میں ٹیم انڈیا نے آسٹریلیا کے خلاف ٹی-20 سیریز میں 0-2 کی ناقابل شکست برتری قائم کرلی ہے اور اب وہ منگل کو ہونے والی سیریز کے تیسرے اور آخری میچ میں 0-3 کی کلین سویپ کے اردے سے اترے گی۔
بھارت کے وقت کے مطابق 1.45 بجے دن میں دونوں ٹیم کے کھلاڑی مقابلے کے لئے میدان میں اتریں گے۔
بھارت نے اس سیریزکا کینبرا میں پہلا میچ 11 رنوں سے اور سڈنی میں دوسرا چھ وکٹوں سے جیتا تھا۔
بھارت نے پہلے مقابلے میں اپنے 161 رنوں کے اسکور کا بخوبی دفاع کیا اور دوسرے میچ میں 195 کے ہدف کو باآسانی حاصل کر لیا۔ تیسرا میچ بھی سڈنی میں ہوگا۔
بھارت کی ٹیم آسٹریلیا کی سرزمین پر دوسری مرتبہ میچوں کی کلین سویپ کرنے اترے گی۔ بھارت نے مہیندر سنگھ دھونی کی کپتانی میں آسٹریلیا کو 16-2015 میں تین میچوں کی سیریز میں 0-3 سے کلین سویپ کیا تھا۔
دونوں ممالک کے درمیان 19-2018 میں آسٹریلیا دورے میں تین میچوں کی گزشتہ سیریز1-1 سے برابر رہی تھی۔ بھارت ٹی-20 میں مسلسل دس جیت حاصل کرچکا ہے۔
ٹیم انڈیا نے ویسٹ انڈیز کو تین، نیوزی لینڈ کو پانچ اور آسٹریلیا کو دومیچوں میں شکست دی ہے۔ وہ ٹی-20 میں افغانستان کے دوسرے سب سے بہترین مظاہرے کی برابری کرنے سے ایک جیت دور ہے۔ افغانستان نے 19-2018 میں ٹی-20 میں مسلسل 12 اور 17-2016 میں لگاتار 11 میچ جیتے تھے۔