جنوبی افریقہ نے جورجی کی سنچری اننگز کی بدولت حاصل کی کامیابی

India vs South Africa 2nd ODI Highlights: ہندوستان نے جنوبی افریقہ کے بلے بازوں کو آؤٹ کرنے کے لیے آٹھ گیند باز میدان میں اتارے، لیکن کوئی خاص کامیابی نہیں مل پائی۔ صرف ارشدیپ اور رنکو نے ایک ایک وکٹ حاصل کیا۔ اس جیت کے ساتھ ہی جنوبی افریقہ نے سیریز میں 1-1 سے برابر حاصل کر لی ہے۔

گکبہارا: جنوبی افریقہ نے اوپنر ٹونی ڈی جورجی کی 119 رنز کی ناٹ آؤٹ سنچری اور ریزا ہینڈرکس کے 52 رنز کی نصف سنچری کی بدولت دوسرے ون ڈے میں ہندوستان کو آٹھ وکٹ سے شکست دے دی۔

212 رنز کے ہدف کے تعاقب میں جورجی اور ریزا ہینڈرکس نے جنوبی افریقی ٹیم کو شاندار آغاز فراہم کیا اور پہلے وکٹ کے لیے 130 رنز جوڑے۔ جورجی نے اپنی پہلی ون ڈے سنچری 109 گیندوں میں مکمل کی۔ انہوں نے 119 رنز کی ناٹ آؤٹ اننگز میں نو چوکے اور چھ چھکے لگائے۔ جنوبی افریقہ کا پہلا وکٹ 28ویں اوور میں ہینڈرکس کی صورت میں گرا ، انہیں ارشدیپ سنگھ نے مکیش کمار کے ہاتھوں کیچ آؤٹ کرایا۔ دوسرا وکٹ 42ویں اوور میں رسی وین ڈیر ڈوسن کی صورت میں 36 رن پر گرا۔ رنکو نے اسے سیم سنگ کے ہاتھوں کیچ آؤٹ کرایا۔ کپتان ایڈن مارکرم دو رنز بنانے کے بعد ناٹ آؤٹ رہے۔ جنوبی افریقہ نے 42.3 اوورز میں دو وکٹوں پر 215 رنز بنائے اور میچ آٹھ وکٹوں سے جیت لیا۔

ہندوستان نے جنوبی افریقہ کے بلے بازوں کو آؤٹ کرنے کے لیے آٹھ گیند باز میدان میں اتارے، لیکن کوئی خاص کامیابی نہیں مل پائی۔ صرف ارشدیپ اور رنکو نے ایک ایک وکٹ حاصل کیا۔ اس جیت کے ساتھ ہی جنوبی افریقہ نے سیریز میں 1-1 سے برابر حاصل کر لی ہے۔ اس سے قبل سائی سدرشن کی 62 رنز اور کے ایل راہل کی 56 رنز کی نصف سنچریوں کی بدولت ہندوستان نے جنوبی افریقہ کو جیت کے لیے 212 رنز کا ہدف دیا۔

جنوبی افریقہ کے کپتان ایڈن مارکرم نے ٹاس جیت کر پہلے گیند بازی کا فیصلہ کیا۔ پہلے بلے بازی کرتے ہوئے ہندوستان کی شروعات خراب رہی اور پہلے ہی اوور میں چار رن پر اوپنر رتوراج گائیکواڑ کا وکٹ گنوا بیٹھا۔ اس کے بعد بیٹنگ کے لیے آنے والے تلک ورما 10 رنز بنا کر پویلین لوٹ گئے۔ انہیں 12ویں اوور میں برگر نے ہینڈرکس کے ہاتھوں کیچ آؤٹ کرایا۔ اس کے بعد سدرشن اور راہل نے مل کر تیسرے وکٹ کے لیے 68 رنز جوڑے۔

ہندوستان کا تیسرا وکٹ 114 کے اسکور پر سائی سدرشن کی صورت میں گرا۔ سدرشن نے اس سیریز میں مسلسل دوسری نصف سنچری بنائی اور 83 گیندوں میں سات چوکوں اور ایک چھکے کی مدد سے 62 رنز بنائے۔ وہیں راہل نے 64 گیندوں میں 56 رنز کی اپنی اننگز میں سات چوکے لگائے۔ سنجو سیمسن نے 12 رنز، رنکو سنگھ نے 17 رنز اور ارشدیپ سنگھ نے 18 رنز بنائے۔ پانچ کھلاڑی دوہرے اعداد و شمار تک نہیں پہنچ سکے اور پوری ہندوستانی ٹیم 46.2 اوورز میں 211 رنز پر آل آؤٹ ہوگئی۔ جنوبی افریقہ کی جانب سے ناندرے برگر نے تین وکٹ حاصل کئے۔ بیورون ہینڈرکس اور کیشو مہاراج نے 2،2 وکٹ حاصل کئے اور لیزرڈ ولیمز اور کپتان ایڈن مارکرم نے ایک ایک بلے باز کو آؤٹ کیا۔

یو این آئی