حیدرآباد: پاکستانی ٹیم نے بھارت کی میزبانی میں ہونے والے ون ڈے ورلڈ کپ 2023 میں زبردست واپسی کی ہے۔ بابر اعظم کی کپتانی میں پاکستان ٹیم نے مسلسل 4 میچ ہارنے کے بعد پہلی جیت درج کی ہے۔ اس نے منگل (31 اکتوبر) کو کھیلے گئے میچ میں بنگلہ دیش کو 7 وکٹوں سے شکست دی۔
کولکاتہ کے ایڈن گارڈنز میں کھیلے گئے اس میچ میں پاکستان کو 205 رنز کا ہدف دیا گیا تھا جس کے جواب میں بابر بریگیڈ نے صرف 32.3 اوورز میں میچ جیت لیا۔ اس فتح کے ساتھ ہی پاکستان کی سیمی فائنل تک رسائی کی امیدیں برقرار ہیں۔ جبکہ بنگلہ دیش مکمل طور پر باہر ہو چکا ہے۔
ورلڈ کپ 2023 کے پوائنٹس ٹیبل میں پاکستان پانچویں نمبر پر پہنچا پاکستان کی جانب سے اوپنر فخر زمان نے 74 گیندوں پر سب سے زیادہ 81 رنز کی اننگز کھیلی۔ اس دوران انہوں نے 7 چھکے اور 3 چوکے لگائے۔ جبکہ عبداللہ شفیق نے 69 گیندوں پر 68 رنز بنائے۔ دونوں نے پہلی وکٹ کے لیے 128 رنز کی شراکت قائم کی۔ بنگلہ دیش کی جانب سے آف اسپنر مہدی حسن معراج نے تینوں وکٹیں حاصل کیں۔
بابر اعظم اس میچ میں ایک بار پھر فلاپ ثابت ہوئے۔ انہوں نے 16 گیندیں کھیلیں اور صرف 9 رنز بنائے۔ ان کے پاس فارم میں واپسی کا اچھا موقع تھا اور وہ کچھ اچھے شاٹس کھیل سکتے تھے۔ دوسری جانب بنگلہ دیشی ٹیم کے بولرز بھی پاکستان پر دباؤ ڈالنے میں ناکام رہے۔
یہ بھی پڑھیں: وراٹ کوہلی نے سچن تنڈولکر کے اس ریکارڈ کی بھی برابری کر لی
اس میچ میں بنگلہ دیش کے کپتان شکیب الحسن نے ٹاس جیت کر پہلے بیٹنگ کا فیصلہ کیا۔ اس کے بعد ٹیم صرف 204 رنز بنا کر ڈھیر ہو گئی۔محمود اللہ نے سب سے زیادہ 56 رنز بنائے۔ ان کے علاوہ لٹن داس نے 45 رنز کی اننگز کھیلی اور کپتان شکیب نے 43 رنز کی اننگز کھیلی۔ پاکستان کی جانب سے شاہین آفریدی اور محمد وسیم نے 3-3 وکٹیں حاصل کیں۔ جبکہ حارث رؤف کو 2 کامیابیاں ملیں۔
آپ کو بتاتے چلیں کہ اس میچ کے لیے پاکستانی ٹیم میں تین تبدیلیاں کی گئی تھیں۔ امام الحق، شاداب خان اور محمد نواز کو ڈراپ کر دیا گیا۔ فخر زمان، سلمان علی آغا اور اسامہ میر کو ان کی جگہ واپس لایا گیا۔
