نئی دہلی: بھارتی ٹیم کے سابق کرکٹر وسیم جعفر نے ایک بار پھر انگلینڈ کے سابق کپتان مائیکل وان پر طنز کیا ہے۔ وسیم جعفر نے آئی سی سی ورلڈ کپ 2023 کے 29 ویں میچ میں بھارت کے ہاتھوں انگلینڈ کی 100 رنز کی شکست کے بعد ایکس پر ایک پوسٹ کرکے مائیکل وان کو ٹرول کیا ہے۔ وسیم جعفر ایکس پر لکھا کہ خوش ہوجاو مائیکل وان، میرے خیال میں انگلینڈ اس ٹورنامنٹ کے ٹاپ 7 میں پہنچ کر اب بھی چیمپئنز ٹرافی 2025 کے لیے کوالیفائی کر سکتا ہے۔ تاہم اس پوسٹ پر مائیکل وان کی جانب سے اب تک کوئی ردعمل سامنے نہیں آیا ہے۔
واضح رہے کہ آئی سی سی کی طرف 2021 میں ہی یہ اعلان کردیا گیا تھا کہ ونڈے ورلڈ کپ 2023 میں ٹاپ کی سات ٹیمیں پاکستان کی میزبانی میں ہونے والی آئی سی سی چیمپیئنز ٹرافی 2025 کے لیے براہ راست کوالیفائی کرجائیں گی اور پاکستان میزبان ہونے کی وجہ سے اس ٹورنامنٹ کا حصہ ہوگا۔ قابل ذکر ہے کہ اس ورلڈ کپ میں انگلینڈ کی ٹیم پوائٹنس ٹیبل میں سب سے نیچے دسویں نمبر پر ہے اور اسے اب چمپیئنز ٹرافی میں شرکت کرنے کے اپنے باقی تمام میچز کو جیتنا ہوگا۔