ICC World Cup 2023 نیوزی لینڈ کی مسلسل دوسری جیت، نیدرلینڈ کو 99 رنز سے شکست

نیوزی لینڈ نے ول ینگ، راچن راوندر اور ٹام لیتھم کی نصف سنچریوں کی بدولت مقررہ 50 اوورز میں سات وکٹوں کے نقصان پر 322 رن بنائے۔ جس کے جواب میں نیدرلینڈ کی پوری ٹیم 223 رنز پر ہی آل آوٹ ہوگئی اور اسے 99 رنوں سے شکست کا سامنا کرنا پڑا۔ اس کے ساتھ ہی نیوزی لینڈ نے ورلڈکپ میں لگاتار دوسری جیت بھی درج کرلی ہے۔

حیدرآباد:ٹام لیتھم کی قیادت میں نیوزی لینڈ نے نیدرلینڈ کے خلاف 322 کا مشکل ہدف دیا جس کے جواب میں نیدرلینڈ 46.3 اوورز میں صرف 223 رنز ہی بناسکی۔ بائیں ہاتھ کے مچل سینٹنر نے 10 اوورز میں 59 رنز دے کر پانچ وکٹیں حاصل کیں اور نیوزی لینڈ کی جانب سے سب سے کامیاب گیندباز رہے اس کے بعد میٹ ہنری نے اپنے 8.3 اوورز میں صرف 40 رنز دے کر تین وکٹیں حاصل کیں۔ بائیں ہاتھ کے آرتھوڈوکس اسپن گیند کرنے والے راچن رویندرا نے باس ڈی لیڈے کی ایک وکٹ حاصل کی۔

اس سے قبل ریاست تلنگانہ کے حیدرآباد کے اپل میں واقع راجیو گاندھی انٹرنیشنل اسٹیڈیم میں کھیلے جارہے آئی سی سی ورلڈ کپ 2023 کے چھٹے میچ میں نیدرلینڈس کی دعوت پر پہلی بیٹنگ کرنے اتری نیوزی لینڈ کی شروعات کافی سست رہی۔ پہلے تین اوورز میں کوئی رن نہیں بن سکا۔ اس کے بعد سلامی بلے باز ڈیون کونوے اور ویل ینگ نے جارحانہ رخ اختیار کرتے ہوئے پہلے وکٹ کے لئے 67 رنوں کی شراکت داری کی۔ گزشتہ میچ میں سنچری بنانے والے ڈیون کونوے 32 رن بنا کر آوٹ ہو گئے ۔

اس کے بعد ویل ینگ نے راچن رابندر کے ساتھ دوسرے وکٹ کے لئے 77 رنوں کی شراکت کی۔ویل ینگ 80 گیندوں پر سات چوکوں اور دو چھکوں کی مدد سے 70 رن بنا کر آوٹ ہوگئے۔ ڈیرل میشل جارحانہ انداز میں بلے بازی کرتے ہوئے 47 گیندوں پر پانچ چوکوں اور دو چھکوں کی مدد سے 48 رن بنا پویلین لوٹ گئے۔ گلین فپلس محض چار رن اور مارک چیپمین پانچ رن بنا کر آوٹ ہوئے۔کپتان ٹام لیتھم 46 گیندوں پر 6 چوکوں اور ایک چھکے کی مدد سے 53 رن بنا کر دت کی گیند پر آوٹ ہوئے۔میشل سینٹینر 17 گیندوں پر تین چوکوں اور دو چھکوں کی مدد سے 36 رن بنا کر ناٹ آوٹ رہے۔

نیوزی لینڈ نے مقررہ 50 اوورز میں سات وکٹوں کے نقصان پر 322 رن بنائے۔ نیدرلینڈس کی جانب سے آرین دت،پال وین میکرین اور رولف وین ڈر ماریوی کو دو دو جبکہ باس ڈی لیڈ کو ایک وکٹ ملا۔