حیدرآباد:حیدرآباد کے اپل میں واقع راجیو گاندھی انٹرنیشنل اسٹیڈیم میں نیوزی لینڈ اور نیدرلینڈس کی ٹیمیں آمنے سامنے ہیں۔دونوں ٹیموں کا یہ دوسرا میچ ہے۔نیوزی لینڈ نے اپنے پہلے میچ میں انگلینڈ کو یکطرفہ مقابلے میں نو وکٹوں سے شکست دی تھی جبکہ نیدر لینڈس کو پاکستان کے خلاف 81 رنوں سے شکست کا سامنا کرنا پڑا تھا۔ آج کے میچ میں نیوزی لینڈ کی ٹیم کو تجربہ کار بلے باز کین ویلمسن کی خدمت حاصل نہیں ہے ۔انہیں میچ فٹ ہونے میں ابھی بھی تھوڑا وقت لگ سکتا ہے ۔ٹیم انتظامیہ کا خیال ہے کہ کین ورلڈ کپ کے اگلے میچ میں ٹیم کا حصہ ہوں گے۔
نیوزی لینڈ کے کپتان ٹام لیتھم نے کہاکہ ورلڈ کپ کے افتتاحی میچ میں انگلینڈ کے خلاف بڑی جیت ملنے کے بعد تمام کھلاڑی اس میچ میں بھی شاندار کارکردگی کامظاہرہ کرنے کے لئے پر عزم ہیں۔ انہوں نے مزید کہا کہ گزشتہ میچ میں پہلے گیندبازوں نے توقعات کے مطابق کھیل کامظاہرہ کیا اور اس کے بعد بلے بازوں کونوے اور راچن رابندر نے شاندار بلے بازی کا مظاہرہ کرتے ہوئے ٹیم کی جیت میں اہم رول ادا کیا۔