کولکاتہ: ڈیوڈ ملر کی 101 رن کی سنچری اور ہینرک کلاسن کی 47 رن کی دلیرانہ اننگز کی بدولت جنوبی افریقہ نے جمعرات کو آئی سی سی ورلڈ کپ کے دوسرے سیمی فائنل میں آسٹریلیا کو جیت کے لئے 213 رن کا ہدف دیا۔ اس چھوٹے ہدف کا تعاقب کرتے ہوئے آسٹریلیا نے تیز رفتار سے شروعات کی جس میں وارنر کے 18 گیندوں میں 29 رنز شامل ہیں اور انھوں نے اس چھوٹی سی اننگز میں 4 چھکے اور ایک چوکے لگائے۔ وہیں دوسری طرف ٹریوس ہیڈ نے 62 رنز کی شاندار اننگز کھیلی۔
اس کے بعد اسمتھ 30، جوس انگلس 28 اور اخیر میں کمنس 14 اور اسٹارک 16 رنز کی بیش قیمتی شراکت داری نے آسٹریلیا کو ورلڈ کپ 2023 کے فائنل میں پہنچا دیا۔ ٹریوس ہیڈ کو بہترین بلے بازی اور گیندبازی کی وجہ سے میچ کا بہترین کھلاڑی قرار دیا گیا۔ وہیں جنوبی افریقہ نے اس میچ کو جیتنے کی بھرپور کوشش کی لیکن خراب فلڈنگ اور بلے بازی کی وجہ سے وہ اس میچ کو گنوا بیٹھے۔ جنوبی افریقہ کی طرف سے کرٹزی اور شمشی کو دو دو وکٹ ملے جبکہ رباڈا، مارکرم اور مہاراجہ کو ایک ایک وکٹ ملا۔ ورلڈ کپ کا فائنل آسٹریلیا اور بھارت کے درمیان 19 نومبر کو احمدآباد کے نریندر مودی اسٹیڈیئم میں کھیلا جائے گا۔
اس سے پہلے جنوبی افریقہ کے کپتان باوما نے ٹاس جیت کر پہلے بلے بازی کا فیصلہ کیا۔ پہلے بیٹنگ کرنے آئے جنوبی افریقہ کی شروعات کافی خراب رہی اور اس نے اپنے دونوں اوپنرز کوئنٹن ڈی کاک کو تین رنز پر اور ٹیمبا باوما کو صفر پر آٹھ اووروں میں کھو دیا۔ اس وقت ٹیم کا اسکور محض آٹھ رن تھا۔ آسٹریلیائی بالر ہیزل ووڈ اور اسٹارک نے دونوں بلے بازوں کو آؤٹ کرکے جنوبی افریقہ کو بڑا دھچکا دیا۔