انٹرنیشنل کرکٹ میں 22 سال پورے کرنے والی 38 سالہ متالی راج نے اتوار کو انگلینڈ کے خلاف پہلے ون ڈے میں 72 رن کی بہترین اننگ کھیل کر ٹیم کو 201 کے اسکور تک پہنچایا تھا۔
جب وہ کریز پر اتری تھیں تب بھارت کا اسکور 27 رنز پر دو وکٹ تھا۔ حالانکہ یہ اسکور انگلینڈ کو چیلنج دینے کے لیے کافی ثابت نہیں ہوا تھا اور اس نے 8 وکٹ سے میچ جیت لیا تھا۔
اپنی شاندار کارکردگی کی بدولت متالی کو تین مقامات کا فائدہ ہوا ہے جس سے وہ پانچویں نمبر پر پہنچ گئی ہیں۔ سابقہ نمبر ایک ون ڈے بلے باز اکتوبر 2019 کے بعد پہلی بار ٹاپ پانچ میں واپس آئی ہیں۔
اس کے علاوہ بھارت کی پوجا وسترکر نے بھی بلے بازی رینکنگ میں 97 ویں جبکہ گیند بازی میں پھر سے 88 ویں مقام پر قبضہ کیا ہے۔
جارحانہ بلے باز اور عالمی نمبر ایک ٹی 20 بلے باز شیفالی ورما نے ون ڈے رینکنگ میں براہ راست 120 واں مقام حاصل کیا ہے۔
اس درمیان انگلینڈ کی سلامی بلے باز ٹیمی بیومونٹ بھارت کے خلاف پہلے ون ڈے میں 87 رنوں کی شاندار اننگ کی بدولت پلیئر آف دی میچ بننے کے بعد ٹاپ مقام پر برقرار ہیں۔ 26 ریٹنگ پوائنٹس کے فائدے کے ساتھ ان کے اوور آل ریٹنگ پوائنٹس 791 ہوگئے ہیں۔
اسی کے ساتھ انگلینڈ کی نتالی شیور بھی اسی میچ میں 74 رن کی عمدہ اننگ کھیل کر نویں سے آٹھویں مقام پر پہنچ گئی ہیں۔ میچ میں اہم دو وکٹ لینے والی انگلینڈ کی تیز گیندباز انیا شربسول تین پوزیشن کے فائدے سے گیندبازی رینکنگ میں آٹھویں مقام پر پہنچ گئی ہیں۔
ٹی 20 کی نمبر ایک گیند باز انگلینڈ کی لیفٹ آرم اسپنر صوفی ایکلسٹون 40 رن پر تین وکٹ لینے کی بدولت چار مقامات کے فائدے کے ساتھ دسویں مقام پرپہنچ گئی ہیں۔ انگلینڈ کی کیٹ کراس تین مقامات کی چھلانگ کے ساتھ 25 ویں نمبر پر آگئی ہیں۔
