دبئی:رواں ورلڈ کپ کے پانچ میچوں میں 354 رن، تین نصف سنچریاں اور ایک سنچری بنانے کے بعد شاندار فارم میں موجود وراٹ کوہلی کو بدھ کو جاری کی گئی تازہ ترین ون ڈے رینکنگ میں نقصان ہوا ہے۔ اس کے علاوہ بابر اعظم کو بھی پوائنٹس کی کمی کا سامنا کرنا پڑا ہے لیکن وہ رینکنگ میں ٹاپ پر برقرار ہیں۔ شبھمن گل 823 پوائنٹس کے ساتھ دوسرے نمبر پر ہیں۔ جبکہ بابر کے 829 پوائنٹس ہیں۔
آسٹریلیائی اوپننگ بلے باز ڈیوڈ وارنر شاندار سنچری اسکور کرنے کے باوجود رینکنگ میں نیچے آگئے ہیں۔ بلے سے مسلسل دھوم مچانے والے ہینرک کلاسن سات مقام کی زبردست چھلانگ لگاتے ہوئے گیارہویں سے چوتھی پوزیشن پر پہنچ گئے۔ وراٹ اور وارنر 747 پوائنٹس کے ساتھ مشترکہ طور پر پانچویں نمبر پر ہیں۔ وہیں ورلڈ کپ 2023 میں تین سنچریاں بنانے والے کوئنٹن ڈی کاک چھٹی سے تیسری پوزیشن پر آگئے ہیں۔
اتوار کو ہونے والے انڈیا بمقابلہ انگلینڈ میچ میں اگر گل کا بیٹ چلتا ہے اور بابر اعظم جنوبی افریقہ کے خلاف فلاپ ہو جاتے ہیں تو گل رینکنگ میں نمبر ایک بلے باز بن سکتے ہیں۔ اب دونوں کے درمیان چھ پوائنٹس کا فرق ہے۔ ہندوستانی کپتان روہت شرما کو اپنی عمدہ فارم کی وجہ سے ایک مقام کا فائدہ ہوا ہے۔ وہ 9ویں سے 8ویں نمبر پر آگئے ہیں۔