فیصلہ کن جنگ کے لیے اتریں گے بھارت اور بنگلہ دیش

روہت شرما کی طوفانی اننگز سے سیریز میں واپسی کرنے والی ہندوستانی ٹیم بنگلہ دیش کے خلاف اتوار کو ہونے والے تیسرے اور آخری ٹی -20 میچ میں سیریز پر گرفت مضبوط کرنے کے ارادے سے اتریں گی۔

بنگلہ دیش نے دہلی میں پہلا میچ سات وکٹوں سے جیتا تھا جبکہ ہندستان نے کپتان روہت کی 85 رنز کی شاندار اننگز سے راجکوٹ میں دوسرا مقابلہ آٹھ وکٹ سے جیت لیا تھا۔ ابھی ناگپور میں فیصلہ کن مقابلے کی باری ہے جس میں دونوں ٹیمیں فتح حاصل کرنے کے لئے پورا زور لگا دیں گی۔

بھارت اور بنگلہ دیش کے مابین تیسرا ٹی 20 میچ

روہت نے دہلی میں پہلے میچ کی شام کہا تھا کہ بنگلہ دیش کی ٹیم اپنے دن کسی بھی ٹیم کو شکست دے سکتی ہے اور بنگلہ دیش نے سات وکٹ کی جیت سے اس بات کو صحیح ثابت کر دکھایا تھا لیکن دوسرے میچ میں روہت کے چھ چوکوں اور چھ چھکوں کے طوفان میں بنگلہ دیش اڑ گیا تھا۔بھارت اور بنگلہ دیش کے درمیان اب تک 10 ٹی -20 مقابلے ہو چکے ہیں جس میں بھارت نے نو جیتے ہیں اور صرف ایک گنوایا ہے۔

بنگلہ دیش نے بھارت سے اب تک کوئی ٹی -20 سیریز نہیں جیتی ہے اور اگر وہ دہلی کی کارکردگی کو دہرا دیتا ہے تو وہ تاریخ رقم کرسکتا ہے۔