سر کا خطاب حاصل کرنے والے کم عمر ترین کرکٹر

عالمی کپ 2019 میں انگلینڈ کو چیمپیئن بنانے میں اہم کردار ادا کرنے والے آل راؤنڈر کھلاڑی بین اسٹوکس کو برطانیہ کے سب سے بڑے شہری اعزاز سے نوازے جانے کا اعلان کیا گیا ہے۔

عالمی کپ کے فائنل مقابلے میں انگلینڈ کی جانب سے بہترین بلے بازی کرنے اور ٹیم کو عالمی چیمپیئن بنانے میں اہم کردار ادا کرنے والے بین اسٹوکس نائٹ ہڈ کا خطاب حاصل کرنے والے سب سے کم عمر شخص ہونے کا اعزاز اپنے نام کر لیں گے۔

انگلینڈ کے اس 28 سالہ کھلاڑی نے لارڈس میں کھیلے گئے عالمی کپ فائنل مقابلے میں 98 گیندوں میں 84 رنز بنائے تھے جبکہ میچ ٹائی ہونے کی صورت میں سپر اوور میں بھی 8 رنز بنائے تھے۔

بین اسٹوکس نے عالمی کپ میں اپنی بہتری کارکردگی سے سب کو متاثر کیا اور انہوں نے 465 رنز کے علاوہ 7 وکٹیں بھی لی تھیں، ان کی اس کارکردگی پر کپتان ایون مورگن نے انہیں سپر ہیومن کہا تھا۔