عمر گل اور عمران فرحت کا کرکٹ سے ریٹائرمنٹ کا فیصلہ

پاکستان کرکٹ ٹیم کے فاسٹ بالر عمر گل نے کرکٹ سے ریٹائرمنٹ کا فیصلہ کر لیا جبکہ اوپنر عمران فرحت نے بھی ڈومیسٹک کرکٹ سے ریٹائرمنٹ لینے کا اعلان کیا ہے۔

عمر گل نے کہا کہ انٹرنیشنل اور ڈومیسٹک کرکٹ سے ریٹائرمنٹ لے رہا ہوں، نیشنل ٹی 20 کپ کے درمیان یا آخر میں ریٹائرمنٹ کا باقاعدہ اعلان کروں گا، یہ میرا آخری ڈومیسٹک ایونٹ ہوگا۔

یاد رہے کہ پاکستان کرکٹ ٹیم کےفاسٹ بالر عمر گل پی سی بی کرکٹ کمیٹی کا بھی حصہ ہیں ریٹائرمنٹ کے بعد کوچنگ سائیڈ پر آنے کا ارادہ رکھتے ہیں۔ عمر گل نے 47 ٹیسٹ میچوں میں پاکستان کی نمائندگی کی اور 163 وکٹیں حاصل کیں جبکہ 130 ایک روزہ میچوں میں عمر گل نے 179 شکار کیے۔ٹی 20 انٹرنیشنل میں عمر گل نے 60 میچوں میں 85 آؤٹ کیے۔

دوسری جانب کرکٹر عمران فرحت نے کہا کہ گذ شتہ سیزن ہی کہہ دیا تھا کہ یہ میرا آخری سیزن ہو گا۔اب کوچنگ کے پروفیشن سے جڑنے کا فیصلہ کیا ہے۔ عمران فرحت نے 40 ٹیسٹ میچوں میں پاکستان کی نمائندگی کرتے ہوئے 2400 رنز بنائے جبکہ 58 ایک روزہ میچوں میں انہوں نے 1719 رنز بنائےاور 7 ٹی ٹوئنٹی میں پاکستان کی نمائندگی کرتے ہوئے 76 رنز بنائے۔