ہر وقت اپنی بہترین کوشش کریں، بار بار موقع نہیں ملتا: متھالی

بھارتی ون ڈے خاتون کرکٹ ٹیم کی کپتان متھالی راج نے نوجوانوں کی یہ کہتے ہوئے حوصلہ افزائی کی ہے کہ ہرکسی کو ہمیشہ اپنی بہترین کارکردگی پیش کرنا چاہئے کیونکہ بار بار موقع نہیں ملتا ۔

اسٹار اسپورٹس 'گرلز پاور' پروگرام میں اپنے تجربات شئیر کرتے ہوئے متھالی نے کہا کہ انٹیگا میچ میں شامل نہ کئے جانے کے بعد میں بہت مایوس ہوئی تھی ۔ لیکن ایسا اکثر تمام کھلاڑیوں کے ساتھ ہوتا ہے۔ میں پہلی نہیں ہوں جس کے ساتھ یہ ہوا ہے۔ اس کا انحصار ٹیم کی ساخت پر ہے اور کپتان اور کوچ پلئینگ الیون کا فیصلہ کرتے ہیں لیکن میرے خیال میں اگر ہم یہ میچ جیت جاتے تو ہمارے پاس فائنل کھیلنے کا موقع ہو سکتا تھا۔ میرا مقصد کھلاڑیوں کی صلاحیتوں کو سامنے لانا ہے تاکہ وہ اپنی بہترین کارکردگی کا مظاہرہ کرسکیں۔ بار بار ایسے مواقع میسر نہیں آتے۔

متھالی جب 2018 میں خواتین کے ورلڈ ٹی 20 میں بھارت کے انگلینڈ کے خلاف سیمی فائنل میچ سے قبل پلئینگ الیون سے باہر ہوگئیں تو وہ ایک تنازعہ میں مبتلا ہوگئی تھیں۔ اس کے بعد تجربہ کار کرکٹر نے اس وقت کے ہیڈ کوچ رمیش پوار اور سی او اے کی ڈیانا ایڈولجی پر امتیازی سلوک کا الزام عائد کیا تھا ۔ خاص طور پر متھالی نے لیگ مرحلے میں ایک کے بعد ایک نصف سنچری اسکور کی تھیں۔ انہوں نے کہا کہ لیکن مجھے ہمیشہ امید تھی کہ اگر ہم یہ میچ جیت جاتے ہیں تو مجھے فائنل میں موقع مل سکتا ہے ، میں شراکت میں کامیاب ہوجاؤں گی اور ہمارے پاس کپ جیتنے کا ایک بہتر موقع ہے۔

اپنی بننے والی بائیوپک میں تاپسی پنو کے ذریعے مرکزی کردار ادا کرنے کے بارے میں گفتگو کرتے ہوئے متھالی نے کہا کہ تاپسی بہت زندہ دل اور باتونی اداکارہ ہے۔ ان میں وہ ہمت ہے۔ میں نے ان سے کہا کہ مجھے کچھ وقت دو ، مجھے آرام کرنے دو ، میں آپ کی مدد کروں گی۔ اداکاری کرنا آپ کا پیشہ ہے اور یہ فطری طور پر آئے گا۔ بس آپ کو کور ڈرائیو سیکھنے کی ضرورت ہے۔ لوگ آپ کی کور ڈرائیو کو میری کور ڈرائیو سے مربوط کریں گے۔ ایسے میں آپ کو زیادہ محنت کرنی ہوگی۔