میں کبھی بھی آر سی بی نہیں چھوڑوں گا: وراٹ کوہلی

آئی پی ایل میں آر سی بی ٹیم کی کپتانی کرنے والے وراٹ کوہلی نے کہا ہے کہ 'جب تک وہ آئی پی ایل کھیلیں گے تب تک وہ آر سی بی کے ساتھ رہیں گے۔

دنیا کی سب سے دلچسپ کرکٹ لیگ انڈین پریمیر لیگ (آئی پی ایل) میں بہت سے کھلاڑیوں نے کھیلا لیکن اس میں سے صرف وراٹ کوہلی واحد کھلاڑی ہیں جو برسوں سے صرف ایک ٹیم کے لیے کھیلتے آرہے ہیں۔ دائے ہاتھ کے شاندار بلے باز کوہلی سال 2008 میں بنگلور کی ٹیم سے جڑے اور وہ اس ٹیم کے کپتان بھی بنے۔ اب وہ آئی پی ایل کے 13 ویں سیزن کی بھی کپتانی کرنے جارہے ہیں۔

آئی پی ایل میں سب سے زیادہ رنز بنانے والے کھلاڑی بھی وراٹ کوہلی ہیں۔ وہ سال 2013 سے ہی آر سی بی کی کمان سنبھال رہے ہیں۔ سال 2016 میں ان کی کپتانی میں ٹیم فتح کے بہت قریب پہنچ گئی تھی۔

جب وراٹ کوہلی سے پوچھا گیا کہ کیا وہ کبھی آر سی بی ٹیم کو چھوڑیں گے تو انہوں نے کہا کہ 'میں اس ٹیم کو کبھی بھی نہیں چھوڑوں گا۔ یہ سفر 12 سالوں سے بہت ہی شاندار رہا ہے۔ ہمیں شائقین کے لیے خطاب جیتنا ہے۔ ہم تین بار ہم خطاب کے قریب پہنچے لیکن اسے حاصل نہیں کرسکے ہیں۔

وراٹ نے مزید کہا 'جس طرح سے میرا 12 سال سے اس ٹیم نے خیا رکھا ہے، مجھے جو پیار اور احترام ملا ہے، میں اسے چھوڑنے کے بارے میں نہیں سوچ سکتا۔