بھارت اور پاکستان کے مابین تلخ رشتہ جگ ظاہر ہے اور دونوں ممالک کے مابین رسہ کشی کھیلوں پر بھی وقتاً فوقتاً اثر انداز ہوتی ہے، اس مرتبہ کرکٹ میچز کو لے کر دونوں ممالک میں بحث جاری ہے۔
پاکستان کرکٹ بورڈ کے سی ای او وسیم خان نے دھمکی دی کہ اگر بھارت ایشیاء کپ کھیلنے کے لیے نہیں آتا ہے تو پاکستان بھی سنہ 2021 میں بھارت میں ہونے والے ٹی 20 ورلڈ کپ میں حصہ لینے سے انکار کر دے گا۔
پاکستان کرکٹ بورڈ پی سی بی نے دھمکی دی ہے کہ اگر بھارتی کرکٹ ٹیم رواں برس ستمبر میں ہونے والے ایشیاء کپ ٹورنامنٹ کھیلنے کے پاکستان نہیں آئے گی تو ان کی ٹیم بھی 2021 میں بھارت کی میزبانی میں منعقد ہونے والے ٹی 20 ورلڈ کپ میں حصہ نہیں لیں گی۔
واضح رہے کہ اس سال ستمبر میں ایشیا کپ کا انعقاد پاکستان میں ہونا ہے لیکن بی سی سی آئی پہلے ہی صاف کر چکا ہے کہ بھارتی کرکٹ ٹیم ایشیاء کپ کھیلنے پاکستان نہیں جائے گی۔
بی سی سی آئی کی جانب سے اپنی ٹیم کو پاکستان بھیجنے سے انکار پر قیاس آرائی جاری ہے کہ ایشیاء کپ میچز کے شیڈول میں تبدیلی ہو سکتی ہے لیکن پاکستان کرکٹ بورڈ کے سی ای او وسیم خان نے ان خبروں کو مسترد کیا ہے۔
