اب کھیل رتن کو 25 لاکھ، ارجن کو 15 لاکھ

مرکزی وزیر کھیل کیرن رجیجو نے 29 اگست بروز ہفتہ کو کھیلوں کے دن کے موقع پر قومی کھیل ایوارڈ کی انعامی رقم میں زبردست اضافے کا اعلان کیا جس کے تحت اب ملک کے اعلی اعزاز راجیو گاندھی کھیل رتن جیتنے والے کو 25 لاکھ روپے اور ارجن ایوارڈ جیتنے والے کو 15 لاکھ روپے دیئے جائیں گے۔

رجیجو نے اعلان کیا کہ قومی کھیل ایوارڈز کی سات کیٹیگریز میں سے چار کی انعامی رقم میں اضافہ کیا جا رہا ہے اور اب کھیل رتن جیتنے والے کے لیے ساڑھے سات لاکھ روپے کی بجائے 25 لاکھ روپے، ارجن ایوارڈ کے لیے پانچ لاکھ روپے کی بجائے 15 لاکھ روپے، درون آچاریہ لائف ٹائم کو 5 لاکھ کی بجائے 15 لاکھ روپے ، درون اچاریہ ریگولر کو 5 لاکھ کی بجائے 10 لاکھ روپے اور لائف ٹائم دھیانچند ایوارڈی کو 5 لاکھ کے بجائے 10 لاکھ روپے دیئے جائیں گے۔

مرکزی وزیر کھیل نے کہا کہ ہم نے کھیل ایوارڈز اور ایڈونچر کی انعامی رقم میں اضافہ کرنے کا فیصلہ کیا ہے۔ ہم نے کھیلوں کے ایوارڈز کی انعامی رقم میں اضافہ کردیا ہے اور ایڈونچر کی انعامی رقم ایک دو دن میں بڑھا دی جائے گی۔