بیرسٹو، میکسویل، کیری کی عالمی درجہ بندی میں لمبی چھلانگ

انگلینڈ کے اوپنر جونی بیرسٹو اور آسٹریلیائی جوڑی گلین میکسویل اور الیکس کیری نے جمعرات کو جاری کی جانے والی آئی سی سی مینز ون ڈے پلیئر رینکنگ میں شاندار فائدہ اٹھایا ہے، ان تینوں نے مانچسٹر میں کھیلے گئے تیسرے اور آخری ون ڈے میں شاندار بلے بازی کرتے ہوئے سنچریاں بنائیں۔

بیرسٹو نے بدھ کے روز آسٹریلیا کے خلاف حالیہ اختتام پذیر سیریز کے آخری میچ میں 126 گیندوں میں 112 رن کے بعد سیریز میں مجموعی طور پر 196 رنز کے ساتھ ٹاپ 10 میں واپسی کی۔30 سالہ یارکشائر کھلاڑی کے لئے پچھلا بہترین مقام اکتوبر 2018 میں نویں پوزیشن پر تھا۔ وہ اب مزید 23 پوائنٹس کے ساتھ اپنے کیریئر کے بہترین درجہ بندی کے 777 پوائنٹس پر پہنچ گئے ہیں۔

انگلینڈ کے خلاف آسٹریلیا کو تین وکٹ سے سنسنی خیز فتح مکمل کرنے اور سیریز 2-1 سے جیتنے میں مدد فراہم کرنے اور پانچویں وکٹ کی رفاقت میں 212 رنز بنانے والی جوڑی میکسویل اور کیری ہندستانی کپتان وراٹ کوہلی اور اوپنر روہت شرما کی جوڑی کے بعد رینکنگ ٹیبل میں ایک دوسرے کے آگے پیچھے ہیں۔ میکسویل نے سیریز میں 186 رنز بنانے کے سبب پانچ مقامات کی جست کے بعد آئرلینڈ کے پال اسٹرلنگ کے ساتھ مشترکہ 26 ویں پوزیشن حاصل کرلی ہے جبکہ 152 رنز کے مجموعی اسکور کرنے والے کیری 11 مقامات کی چھلانگ لگا کر کیریئر کی بہترین 28 ویں پوزیشن پر پہنچ گئے ہیں۔

تازہ ترین رینکنگ کے مطابق بلے بازوں کی فہرست میں وراٹ کوہلی کا پہلا نمبر برقرار ہے جبکہ ہندستان ہی کے روہت شرما دوسرے اور پاکستان کے بابر اعظم تیسرے نمبر پر ہیں۔ ٹاپ ٹین بلے بازوں کی فہرست میں بابر اعظم کے سوا کوئی پاکستانی کھلاڑی شامل نہیں، امام الحق 11 ویں اور فخر زمان 15 ویں نمبر پر موجود ہیں۔ بولرز کی ون ڈے رینکنگ میں نیوزی لینڈ کے ٹرینٹ بولٹ کا پہلا اور ہندستان کے جسپریت بمراہ کا دوسرا نمبر ہے جب کہ ون ڈے بولرز کی رینکنگ میں انگلینڈ کے کرس ووکس ساتویں سے چوتھے نمبر پر آ گئے ہیں، پاکستان کے محمد عامر ایک درجہ تنزلی کے بعد ساتویں نمبر پر آ گئے ہیں۔ آل راؤنڈرز کی رینکنگ میں افغانستان کے محمد نبی کا پہلا جب کہ انگلینڈ کے کرس ووکس دوسرے نمبر پر آ گئے ہیں۔ آل راؤنڈرز کی رینکنگ میں پاکستان کے عماد وسیم بدستور تیسرے نمبر پر موجود ہیں۔

فہرست میں شامل ہونے والے دیگر افراد میں آسٹریلیا کے مارنس لیبوشین (کیریئر کی بہترین 63 ویں نمبر پر 20 مقام کی چھلانگ کے ساتھ) اور انگلینڈ کے سیم بلنگس شامل ہیں جنہوں نے پہلے میچ میں 118 رنز بنائے تھے اور جن کا مجموعی اسکور سیریز میں 183 رنز رہا ، وہ بیرسٹو اور میکسویل کے پیچھے ہیں اورپہلی بار ٹاپ 100 میں جگہ بنائی ہے۔ انگلینڈ کے آل راؤنڈر کرس ووکس نے بھی بولرز کی درجہ بندی میں کامیابی حاصل کی اور سیریز میں چھ وکٹیں حاصل کرنے کے بعد تین مقامات کے فائدے سے کیریئر کی بہترین چوتھی پوزیشن حاصل کی۔ وہ اب آل راؤنڈر کی فہرست میں دوسرے نمبر پر ہیں جبکہ انہوں نے سیریز میں 89 رنز بنائے ہیں۔

ان کے ہم وطن بین اسٹوکس بھی ان لوگوں میں شامل ہے جنہوں نے افغانستان کے محمد نبی کے ساتھ 20 پوائنٹس کے اندر پہنچنے میں پیشرفت کی ہے۔ آسٹریلیائی فاسٹ بالر جوش ہیزل ووڈ تقریبا دو برسوں میں پہلی بار ٹاپ 10 میں واپس آئے ہیں۔ وہ 15 ویں سے آٹھویں پوزیشن پر پہنچ گئے ہیں۔ انگلینڈ کے فاسٹ بالر جوفرا آرچر نے 18 پائدان کی چھلانگ کے ساتھ کیریئر کے بہترین 10 ویں مقام پر پہنچ گئے ہیں۔ آسٹریلیا کے لیگ اسپنر ایڈم زمپا سیریز میں سب سے زیادہ 10 وکٹیں لینے پر 21 ویں پوزیشن پر آگئے ہیں۔

پانچ بار کی عالمی چمپئن آسٹریلیا نے دوطرفہ ون ڈے سیریز میں جیت کے بعد متعارف کرائی گئی سپر لیگ کی اپنی پہلی سیریز سے 20 پوائنٹس حاصل کر لئے ہیں۔ سپر لیگ کی ٹاپ سات ٹیمیں اور میزبان انڈیا 2023 میں منعقد ہونے والے ورلڈ کپ کے لئے براہ راست داخلہ حاصل کریں گی۔ انگلینڈ پوائنٹس ٹیبل میں 30 پوائنٹس کے ساتھ سرفہرست ہے لیکن وہ واحد ٹیم ہے جس نے دو سیریز کھیلی ہیں اور چمپئن شپ کے شروع میں ہی آئرلینڈ کے خلاف گھر میں 2-1 سے کامیابی حاصل کی تھی۔