دوستوں کے ساتھ کھیلنا دراصل یہی زندگی ہے: کپل دیو

کپل دیو نے ایک ویڈیو پیغام کے ذریعہ لوگوں کو دیوالی کی مبارکباد دیتے ہوئے اپنی صحت کے بارے میں کہا کہ میں صحتمند اور خوش ہوں، میرا دل بھی ٹھیک کام کر رہا ہے۔

بھارتی کرکٹ ٹیم کے سابق کپتان کپل دیو کی کچھ روز قبل انجیو پلاسٹی سرجری ہوئی تھی، انھوں نے ایک ویڈیو ٹویٹ کرتے ہوئے کہا ہے کہ وہ صحت مند ہیں اور ان کا دل بھی۔

گزشتہ ماہ کپل کو دل کا دورہ پڑا تھا جس کے بعد انھیں انجیو پلاسٹی سرجری کرائی گئی تھی۔

کپل نے ٹویٹر پر کہا کہ "سب کو دیوالی مبارک ہو، مجھے امید ہے کہ یہ سال سب کے لیے بہت ساری خوشخبری لے کر آئے۔ آپ کی دعاؤں کے لیے شکریہ، میں صحتمند اور خوش ہوں، میرا دل بھی ٹھیک کام کر رہا ہے، میں دنیا کے لوگوں کو نیک خواہشات دینا چاہتا ہوں۔ "

کپل دیو جمعرات کو گولف کورس میں واپس آئے، انھوں نے دہلی گولف کلب میں اپنے دوستوں کے ساتھ گولف کھیلتے ہوئے ایک ویڈیو پوسٹ کیا تھا۔

اس ویڈیو میں 61 سال کے کپل دیو نے کہا "گولف کورس اور کرکٹ کے میدان میں واپس آنا کتنا اچھا محسوس ہوتا ہے، اس کو الفاظ میں بیان نہیں کیا جاسکتا، گولف کورس میں واپس آنا دوستوں کے ساتھ کھیلنا لطف اٹھانا حیرت انگیز ہے دراصل یہی زندگی ہے۔ "