اپنے دور میں حریف بلے بازوں کی نیندیں حرام کرنے والے پاکستان کے سابق فاسٹ بالر وقار یونس نے انگلینڈ کے جوفرا آرچر کی تعریف کرتے ہوئے کہا کہ وہ آسان رن اپ کے ساتھ بولنگ کرتے ہیں اور انہوں نے چیزوں کو اپنے لیے مشکل نہیں بنایا ہے۔
وقار یونس نے کہا کہ وہ آرچر کو ورلڈ کپ سے قبل ہی بغور دیکھ رہے ہیں اور ان کے مطابق جوفرا آرچر عمدہ ایتھلیٹ اور دیکھنے میں اچھے لگنے والے بالر ہیں جو توقع کے مطابق بولنگ کر رہے ہیں۔
سابق فاسٹ بالر نے کہا کہ انگلینڈ خوش قسمت ہے کہ انہیں مستقبل کا بالر ملا ہے، آرچر روایتی طور پر ویسٹ انڈین گیند بازوں کی طرح انتہائی خطرناک بولنگ کرنے کے عادی ہیں۔
وقار یونس نے کہا کہ جوفرا آرچر وسیم اکرم اور مجھ سے مختلف بالر ہیں ، ہمارا انداز کچھ اور ہوتا تھا جبکہ جوفرا آرچر تیز گیند اور باؤنسر سے اٹیک کرنے کی کوشش کرتے ہیں۔
واضح رہے کہ ان دنوں کرکٹ کی دنیا میں انگلش بالر جوفرا آرچر کی تیز گیندوں نے دھوم مچا رکھی ہے۔