روٹ اور ہولڈر کو تیسرے ٹیسٹ میں جیت کا یقین

انگلینڈ اور ویسٹ انڈیز کرکٹ ٹیموں کے کپتان جو روٹ اور جیسن ہولڈر نے جمعہ سے اولڈ ٹریفورڈ، مانچسٹر میں شروع ہونے والے تین ٹیسٹ میچوں پر مشتمل سیریز کے تیسرے اور آخری میچ میں اپنی اپنی ٹیم کے جیت کے دعوے کیے ہیں۔

انگلینڈ ٹیم کے کپتان جو روٹ کا کہنا ہے کہ ٹیم مکمل طور پر فٹ اور بھرپور فارم میں ہے - مہمان ٹیم کو تیسرے میچ میں بھی شکست دیکر سیریز میں 2-1 کی فتح حاصل کرے گی۔

انہوں نے کہا کہ وہ کالی آندھی کے خلاف کامیابی پر بہت خوش ہیں جبکہ ویسٹ انڈیز کپتان جیسن ہولڈر کا کہنا ہے کہ دوسرے ٹیسٹ میں شکست کے باوجود ٹیم کے حوصلے پست نہیں ہوئے ہیں ۔انہوں نے کہا کہ ان کی ٹیم انگلینڈ کو تیسرے ٹیسٹ میں شکست دینے کے لیے پر عزم ہے ۔ اس اعتبار سے توقع کی جارہی ہے کہ دونوں ٹیموں کے درمیان ٹیسٹ سیریز کا تیسرا اور آخری میچ سخت اور کانٹے دار ہوگا۔ ٹیسٹ سیریز آئی سی سی ورلڈ ٹیسٹ چمپئن شپ کا حصہ ہے۔

انگلینڈ اور ویسٹ انڈیز کی کرکٹ ٹیموں کے درمیان تین ٹیسٹ میچوں پر مشتمل سیریز کا تیسرا اور آخری میچ جمعہ سے 28 جولائی تک اولڈ ٹریفورڈ، مانچسٹر میں کھیلا جائے گا۔ دونوں ٹیموں کے درمیان تین میچوں کی سیریز 1-1 سے برابر ہے۔

ویسٹ انڈیز کی ٹیم نے ساؤتھمپٹن میں کھیلے گئے پہلے میچ میں انگلینڈ کو 4 وکٹوں سے شکست دی تھی جس کا حساب انگلینڈ نے مانچسٹر میں کھیلے گئے دوسرے ٹیسٹ میں 113 رنز کی فتح سے چکتا کر دیا۔اس کامیابی کے ساتھ انگلینڈ کی ٹیم کی آئی سی سی ورلڈ ٹیسٹ چمپئن شپ میں ایک درجہ ترقی ہوئی ہے اور انگلینڈ کی ٹیم اب 186 پوائنٹس کے سے ٹیبل چوتھے سے تیسرے نمبر پر پہنچ گئی ہے۔