حیدر آباد کے خلاف بنگلور کا چھوٹا اسکور

سن رائیزرس حیدرآباد نے اپنے اہم مقابلے میں گیند بازوں کی بہتر کارکردگی کی بدولت رائل چیلینجرز بنگلور کو 120 رنز کے معمولی اسکور پر روک دیا۔

رائل چیلینجرز بنگلور نے سن رائیزرس حیدرآباد کے خلاف آئی پی ایل کے 52 ویں میچ میں مقررہ 20 اوورز میں 7 وکٹوں کے نقصان پر 120 رنز بنائے۔

سن رائیزرس حیدر آباد کے کپتان ڈیوڈوارنر نے ٹاس جیت کر بنگلور کو بلے بازی کی دعوت دی تھی جسے حیدر آباد کے گیند بازوں نے درست قرار دیتے ہوئے بنگلور کے بلے بازوں کو کھُل کر کھیلنے کا موقع نہیں دیا۔

رواں سیزن میں ابھی تک بہترین بلے بازی کا مظاہرہ کرنے والے نوجوان کھلاڑی دیودوت پڈیکل اس میچ میں ناکام ہوگئے اور محض 5 رنز بنا کر سندیپ شرما کی گیند پر بولد ہوگئے جبکہ وراٹ کوہلی بھی 7 رنز پر پویلین لوٹ گئے۔

اس کے بعد اے بی ڈی ویلیئرز نے ٹی کو شروعاتی بحران سے نکالنے کی کوشش کی لیکن وہ بھی زیادہ دیر تک کریز پر نہیں ٹک سکے اور 24 رنز بنا کر آؤٹ ہوگئے جبکہ واشنگٹن سندر نے 21 رنز بنائے۔

حالانکہ سلامی بلے باز جوش فلپ دوسرے جانب سے اکیلے مزاحمت کرتے رہے لیکن دوسرا کوئی بھی بلے باز ان کا ساتھ نہیں دے سکا۔ فلپ نے سب سے زیادہ 32 رنز بنائے۔

سن رائیزرس حید آباد کی جانب سے سندیپ شرما اور جیسن ہولڈر نے دو دو وکٹیں حاصل کیں جبکہ ٹی نٹراجن، شہباز ندیم اور راشد خان کے حصے میں ایک ایک وکٹ آئے۔