ڈیوڈ وارنر نے کہا کہ 'ٹی 20 ملتوی ہونے اور آئی اپیل میں شرکت کے لیے کھلاڑیوں کو آسٹریلیا بورڈ کی منظوری لینی ہوگی۔ وارنر آئی پی ایل فرنچائزی سن رائزرس حیدرآباد کی جانب سے کھیلتے ہیں۔
وارنر نے کہا کہ 'اگر اس سال ٹی 20 عالمی کپ نہیں ہوتا ہے اور اس کی جگہ آئی پی ایل منعقد ہوتا ہے تو مجھے یقین ہے کہ آسٹریلیائی کھلاڑی انڈین پریمیر لیگ میں ضرور کھیلیں گے۔ اس کے لیے کرکٹ آسٹریلیا کی منظوری بھی ضروری ہوگی۔
واضح رہے کہ رواں برس آسٹریلیا کی میزبانی میں ٹی 20 عالمی کپ 18 اکتوبر سے کھیلا جانا ہے لیکن کورونا وائرس کے سبب عالمی کپ کے انعقاد پر خطرات کے بادل منڈلا رہے ہیں اور اس سلسلے میں حتمی فیصلہ آئی سی سی کی میٹنگ میں کیا جائے گا جو آئندہ ماہ ہوگی۔
اس سے قبل آئی پی ایل 29 مارچ سے ہونے والا تھا لیکن بھارت سمیت دنیا میں کورونا وائرس کے بڑھتے کیسز کے سبب اسے غیر معینہ مدت تک کے لیے ملتوی کر دیا گیا۔
حال ہی میں کرکٹ آسٹریلیا کے چیئرمن ارل ایڈنگس نے کہا تھا کہ اس سال عالمی کپ کا انعقاد مشکل ہے کیونکہ ٹورنامنٹ کے لیے کورونا وائرس کے بیچ 16 ٹیموں کو ایک جگہ پر لانا چیلنج ہوگا۔
اس کے بعد آسٹریلیائی وزیراعظم اسکاٹ مارسن نے سبھی کھیلوں کے لیے اسٹیڈیم میں 25 فیصد ناظرین کے آنے کی منظوری دی جس کے بعد ٹی 20 عالمی کپ کے انعقاد کی امید بڑھ گئی ہے۔
دوسری جانب بی سی سی آئی عالمی کپ منسوخ ہونے کی صورت میں اس کی جگہ اکتوبر نومبر میں آئی پی ایل کے انعقاد پر غور کررہا ہے لیکن عالمی کپ ہونے کی قیاس آرائیوں سے آئی پی ایل کے انعقاد پر بھی تذبذب برقرار ہے۔
