بھارت کے تیز گیند باز بھونیشور کمار گروئن چوٹ کے سبب ویسٹ انڈیز کے خلاف اتوار سے شروع ہو رہی تین میچوں کی ون ڈے سیریز سے باہر ہو گئے ہیں اور ان کی جگہ تیز گیند باز شاردل ٹھاکر کو ٹیم میں شامل کیا گیا ہے۔
بھونیشورکمار نے بدھ کو ویسٹ انڈیز کے خلاف ممبئی میں آخری ٹی۔20 میچ میں دائیں گروئن میں درد کی شکایت کی تھی جس کے بعد ان کا الٹرا ساؤنڈ کرایا گیا۔
بی سی سی آئی کی میڈیکل ٹیم کے مطابق بھونیشورکمار کو ہرنیا کی شکایت ہے جس کے لئے ماہرین کا مشورہ لیا جائے گا اور ٹیم مینجمنٹ اس کے مطابق ہی فیصلہ کرے گا۔
بھارت کے گیند باز کوچ بھرت ارون نے پہلے ون ڈے کی جگہ چنئی میں جمعہ کو پریس کانفرنس میں بھونیشور کی چوٹ کے بارے میں زیادہ کچھ نہیں بتایا تھا۔
انہوں نے اتنا ہی کہا کہ ٹیم فزیوتھیریپسٹ سے بات چیت کرنے کے بعد میڈیا بیان جاری کیا جائے گا۔ بی سی سی آئی نے بھونیشور کی گروئن چوٹ کی تصدیق کی ہے اور قومی سلیکٹروں نے بھونیشور کی جگہ تیز گیند باز شاردل ٹھاکر کو ٹیم میں شامل کیا ہے۔