نیوزی لینڈ کیخلاف 18 رکنی آسٹریلیائی خاتون ٹیم کا اعلان

کرکٹ آسٹریلیا نے نیوزی لینڈ خاتون کرکٹ ٹیم کے خلاف ستمبر میں کھیلے جانے والے ٹورنامنٹ میں 18رکنی خاتون کرکٹ ٹیم کا اعلان کیا ہے۔

کرکٹ آسٹریلیا (سی ای) نے ستمبر میں نیوزی لینڈ خاتون ٹیم کے خلاف تین ایک روزہ اور تین ٹی ٹوئنٹی بین الاقوامی میچوں پر مشتمل سیریز کے لئے 18 رکنی ٹیم کا اعلان کر دیا ہے۔ ٹیلہ ویلیمینک کے دستیاب نہ ہونے کی وجہ سے آل راؤنڈر مائٹلن براؤن کو اسکواڈ میں شامل کیا گیا ہے۔

رواں سال ورلڈ کپ کے دوران ہیمسٹرنگ کی انجری کا شکار ہونے والی ایلیسی پیری کو بھی اسکواڈ میں شامل کیا گیا ہے، تاہم ان کی شمولیت فٹنس سے مشروط ہے۔ آئی سی سی ویمنز ٹی 20 ورلڈ کپ کے ابتدائی میچ کے دوران ٹیلہ ویلیمینک کے ٹخنوں میں فریکچر کی تشخیص ہوئی تھی اس لئے قومی سلیکٹر شان فلیگلر نے ان کو اسکواڈ میں واپس نہ لانے کا فیصلہ کیا ہے۔ فٹنس مسائل کے باعث ویلیمینک ویمنز بگ بیش لیگ میں بھی شرکت سے محروم رہیں گی۔ ایرن برنز کی اکتوبر 2019 کے بعد ٹیم میں واپسی ہوئی ہے۔ فاسٹ بالر بیلنڈا واکریوا اس سے قبل آسٹریلیا کی نمائندگی کرچکی ہیں، وہ بھی اسکواڈ میں جگہ بنانے میں کامیاب ہوئی ہیں۔

شان فلیگلر نے کہا ہے کہ میٹلان نے نیشنل پرفارمنس اسکواڈ اور آسٹریلیا اے میں اپنی عمدہ کارکردگی سے متاثر کیا ہے۔ انہوں نے کہا کہ ون ڈے اور ٹوئنٹی سیریز کے میچ نیو ساؤتھ ویلز اور کوئنز لینڈ میں شیڈول ہیں لیکن کرکٹ آسٹریلیا نے تصدیق کی ہے کہ کووڈ19 کے پھیلاؤ کے خدشے کے پیش نظر مقامات میں تبدیلیاں کی جا سکتی ہیں۔

18 رکنی آسٹریلوی ویمن سکواڈ میں میگ لیننگ (کپتان)، راچیل ہینس، مائٹلن براؤن، ایرن برنز، نیکولا کیری، ایشلی گارڈنر، ایلیسا ہیلی، جیس جوناسن، ڈلیسا کیمینس، تحلیہ میکگراتھ، سوفی مولینکس، بیتھ مونی، ایلیسی پیری (فٹنس سے مشروط)، میگن اسکٹ، مولی اسٹرانو، انابیل سدرلینڈ، جارجیا ویرہم اور بیلنڈا واکروا شامل ہیں۔