زمبابوے کیلئے دورہ پاکستان کا کورونا ایس او پیز

پاکستان کرکٹ بورڈ نے زمبابوے کرکٹ کو دورہ پاکستان کے لیے کورونا ایس او پیز کی ابتدائی تفصیلات ارسال کردی ہیں۔ تین ایک روزہ اور 3 ٹی ٹوئنٹی میچوں پر مشتمل دورہ پاکستان کے لیے زمبابوے کرکٹ اور پی سی بی کے درمیان بات چیت حتمی مراحل میں داخل ہوگئی ہے۔

ذرائع کا کہنا ہے کہ زمبابوے کرکٹ ٹیم کی پاکستان آمد 20 اکتوبرکو متوقع ہے، جس سے قبل پی سی بی نے زمبابوے کرکٹ کو کورونا ایس اوپیزکی ابتدائی تفصیلات بھجوا دی ہیں جن میں کھلاڑیوں، اسپورٹ اسٹاف اورمتعلقہ لوگوں کی صحت کی حفاظت کو اولین ترجیح دی گئی ہے۔

ذرائع کا کہنا ہے کہ دونوں ٹیموں کو یکساں ایس او پیز پر عمل درآمد کو یقینی بنانا ہوگا، جب کہ بائیو سیکیورببل انٹرنیشنل ایس او پیز کو سامنے رکھ کر تیار کیا جائے گا۔

ذرائع کا مزید کہنا ہے کہ زمبابوے کرکٹ ٹیم کوپاکستان پہنچنے کے بعد کم از کم 5 روز کا قرنطینہ مکمل کرنا ہوگا اور پاکستان آمدسےقبل زمبابوے اسکواڈ میں شامل افراد کا ایک کورونا ٹیسٹ منفی آنا لازمی ہے۔

پی سی بی کی جانب سے بھیجی گئی تفصیلات میں مزید کہا گیا ہے کہ پاکستان آمد پربھی زمبابوے کے کھلاڑیوں کا کورونا ٹیسٹ ہوگا۔