ایشیز سیریز: تیسرا دن بھی بارش سے متاثر

تاریخی میدان لارڈس پر جاری دوسرے ایشیز سیریز کے دوسرے ٹیسٹ کے تیسرے روز بھی بارش کی وجہ سے کھیل متاثر ہوا۔

مسلسل بارش سے میچ کے تیسرے دن کا پورا کھیل نہیں ہو سکا، اس دوران آسٹریلیا نے انگلینڈ کے خلاف اپنی پہلی اننگز میں 4 وکٹوں کے نقصان پر 80 رنز بنا لیے ہیں۔

میزبان انگلینڈ نے اپنی پہلی اننگز میں 258 رن بنائے تھے جس کے بعد آسٹریلیا اب انگلینڈ کے اسکور سے 178 رنز پیچھے ہے۔

دوسرے ٹیسٹ کے پہلے دن کا کھیل بھی بارش کی نذر ہوا تھا جبکہ دوسرے دن ہی مکمل کھیل ممکن ہو پایا اور تیسرے دن دوپہر کے کھانے کے بعد کھیل ہی نہیں ہو سکا۔

آسٹریلیائی ٹیم محض 13 اوورز ہی کھیل سکی، سلامی بلے باز ڈیوڈ وارنر تین رنز بنا کر اسٹورٹ براڈ کی گیند پر آؤٹ ہوئے۔

اس سے قبل انگلینڈ ٹیم پہلی اننگ میں 258 رنز ہی بنا سکی تھی، ٹیم کی جانب سے روری برنس اور جانی بیرسٹو نے نصف سنچری بنائی تھی جبکہ آسٹریلیا کی جانب سے پیٹ کمنز، جوش ہیزل ووڈ اور ناتھن لیون نے تین تین بلے بازوں کو پویلین کی راہ دکھائی۔